"ХУУЛЬ БҮХНИЙГ ХҮҮХДИЙН ТӨЛӨӨ"

Монгол Улсын Эрүүгийн хуулийн 12 дугаар бүлэгт заасан “Хүчиндэх, бэлгийн дур хүслээ ёс бусаар хангах” гэмт хэргийн улмаас сүүлийн жилүүдэд насанд хүрээгүй охид, бага насны хүүхдүүд өртөх нь ихэсч, хохирогч болсон хүүхдүүдийн амьдрал нөхөн сэргэхгүйгээр хохирч байгаа гэх мэдээллийг бид сонсож л байдаг, байж л байдаг мэт дасал болсон нь хэдийнээс вэ?

Мэдэх үү, манай улсын нийт хүн амын 1.3 сая буюу 36.2 хувь нь 0-17 хүртэлх насны хүүхдүүд. Тэдний 51.2 хувь нь эрэгтэй, 48.8 хувь нь эмэгтэй гэх судалгаа байдаг.

Бид буюу Монгол бол хүүхэд, залуусын орон. Хүүхэд залуусдаа хүйтэн хөндий ханддагаараа дэлхийд тэргүүлнэ. Залуус нь залхаад ядраад, урам  байтугай нь хугараад улс орон дамжаад дэлхийгээр нэг тарчихсан. Одоо охид, хүүхдүүд нь айдас хүйдэстэй, насан туршийн сэтгэл айдас түгшүүртэй амьдрах нь тодорхой болчихож.

Цагдаагийн байгууллага Монгол Улсад өдөрт нэг, Улаанбаатар хотод 36 цаг тутамд нэг хүүхэд хүчиндэх гэмт хэргийн хохирогч болж байна гэх хиртхийм мэдээлллийг өгч байна.

Сүүлийн 5 жилийн хугацаанд Монгол Улсын Эрүүгийн хуулийн 12 дугаар бүлэг буюу Хүний бэлгийн эрх чөлөө, халдашгүй байдлын эсрэг үйлдсэн гэмт хэрэг 1601 бүртгэгджээ.

Бүр тодруулбал, 2020 онд 233, 2021 онд 272, 2022 онд 333, 2023 онд 365, 2024 онд 398 хэрэг бүртгэгджээ. Дээрхи 5 зүйл ангид заасан гэмт хэргийн улмаас сүүлийн 5 жилд 1553 эмэгтэй, 77 эрэгтэй хүүхэд өртөж хохирсноос:

• 0-7 насны 110
• 8-13 насны 685
• 14-17 насны 835 хүүхэд байна.

Хохирогчдыг нийгмийн байдлаар нь авч үзвэл сурагч 1320, сургууль завсардсан 21, оюутан 60, бусад 229 байна.

Check.mn сайтын редакц “Check нэг сэдэв”-ийн хүрээнд “Хууль бүхнийг хүүхдийн төлөө” үндэсний хөдөлгөөнийг эхлүүлж байна.

Check.mn сайтын редакц