Монгол Улсын хүн амын тал хувь нь амьдардаг Хотын дарга нарыг үе үеийн Ерөнхий сайдууд томилж ирсэн түүхтэй. Энэ ч утгаараа сайдын эрэмбэтэй нөхөд л Ерөнхий сайдын багаас энэ албанд очдог бичигдээгүй хуультай. Харин одоо Ерөнхий сайдаар Г.Занданшатар томилогдсон учраас Хотын дарга Х.Нямбаатар хүссэн хүсээгүй тамгаа өгч таарна. Нөгөө талаар Г.Занданшатар дүрмийн дагуу Ерөнхий сайд болсон учраас МАН-ын дарга болно. Тэгэхээр нийслэлийн МАН-аа ч өөрийн хүнд өгнө. Энэ бол улс төрийн орхиж болохгүй “хууль” юм.  

Тиймдээ ч нэгэнтээ Л.Оюун-Эрдэнэ ойрын садан болох Х.Нямбаатарыг УИХ-ын гишүүн, Хууль зүй, дотоод хэргийн сайдын карьераас буулган Хотын дарга, нийслэлийн МАН-ын хорооны дарга болгож байв. Мөн өнгөрөгч 2024 оны сонгуулийн дараа ч Л.Оюун-Эрдэнийн саналаар түүнийг Хотын даргаар улираан томилсон. Процессын хувьд ч амархан, МАН-ын дарга Ерөнхий сайд өөрийн хүнээ томилно гэвэл нийслэлийн намын хорооны Бага хурлаар хэлэлцээд батласны дараа НИТХ томилгоог нь хэлэлцэн баталгаажуулдаг. Өдгөөгийн НИТХ-ын 45 төлөөлөгчийн бараг 40 шахам нь МАН-ын гишүүн ажилладаг.

Харин Гүйцэтгэх засаглалын багаас хэн гээч Засаг дарга “өргөгдөн” очихыг одоогоор шууд нэрлэх аргагүй ч ойрын эх сурвалжийн хэлж байгаагаар УИХ-ын гишүүн Г.Лувсанжамцыг дээд хүрээнд яригдаж байгаа гэх. Болохгүй зүйл үгүй. МАН-ын жагсаалтаар УИХ-д орж ирсэн нөхөр нийслэл рүү яваад өгнө. Харин ч жагсаалтад хоншоороо тасдуулсан нэг нөхөр нь парламентад уламжилж ирнэ л биз.

Тэгээд ч Г.Лувсанжамц нь хотын асуудлыг хамгийн их ярьдаг хүний нэг. Тэрбээр парламентад орж ирсэн даруйд УИХ-ын дарга Д.Амарбаясгалангийн 85 дугаар захирамжаар байгуулагдсан Хот суурин газрыг орон сууцжуулахад ногоон санхүүжилтийн тогтолцоог бүрдүүлэх, холбогдох эрх зүйн орчныг сайжруулах чиглэлээр санал, дүгнэлт гаргах холбогдох хуулийн төсөл боловсруулах үүрэг бүхий ажлын хэсгийн ахлагчаар ажиллаж эхэлсэн. УИХ-ын дарга Д.Амарбаясгалангаас ч дэмжлэгтэй гэж ярьдаг нь оргүй зүйл биш. Энэ цагаас хойш хотын асуудалд шүүмжлэлтэй хандаж ирсэн гишүүн.

Мөн нэг нэр Хотын даргад яригдаж байгаа нь НИТХ-ын төлөөлөгч, “Улаанбаатар хот орон сууцжуулалт” компанийн Гүйцэтгэх захирал З.Төмөртөөмөө. Түүний хувьд хотын агаар орчны бохирдол хариуцсан орлогчоор ажиллаж байсан. З.Төмөртөөмөө анх улс төрд хөл тавьж, МАН-ын Хэвлэлийн албанд мэргэжилтнээр ирэхдээ Г.Занданшатарын дэмжлэгээр ирсэн. Тэр үүнээс хойш түүнээс салаагүй дэмжүүлж ирсэн. Шударга өрсөлдөөн хэрэглэгчийн төлөө газрын даргын зөвлөх, Г.Занданшатарыг УИХ-ын гишүүн, Засгийн газрын хэрэг эрхлэх газрын дарга, УИХ-ын дарга байхад Зөвлөхөөр нь ажиллаж байгаад Хотын орлогч даргаар дэмжүүлсэн, нэг нутгийн итгэлт сайн дүү нь юм.

Эцэст нь хэлэхэд Х.Нямбаатар Хотын даргаар ажиллах хугацаандаа тулгамдсан асуудлаа шийдвэрлэж чадаагүй. Мэдээж хэрэг, цэгцлэх оролдлого байсан ч бодлогын түвшинд хөдөлгөсөн цогц ажил алга. ТҮЦ, хашаа хороо буулгах, бродюур шинэчлэх гэх мэт тулга тойрсон зүйлтэй “ноцолдож” ирснээс стратегийн түвшинд хүрсэнгүй.   

Ц.Цэнгэл