Хор хорз нь нь холилдож арз болсон асуудал Төрийн ордонд өрнөж байна. Ингээд хэлчихвэл хилсдүүлсэн, хэтрүүлсэн болохгүй байх. Уг нь Л.Оюун-Эрдэнийн Засгийн газар Монгол Улсын гүйцэтгэх засаглалын түүхэнд анх удаа таван жил тэргүүлэгчээр ажилласан бахдам амжилтаар түүхэнд тэмдэглэгдэн үлдэнэ.  Харамсалтай нь стандарт бус гэж хараалгуулсаар байгуулсан хамтарсан Засгийн газар нь 10-хан сарын настай байлаа.

За энэ ч яах вэ. Замхруулж сурсан манайхан нээлттэй хуралдах санал хураалтыг нууцалж, унагасан шигээ  үргэлжлүүлж, ҮХЦ-д өргөдөл гаргаж, маргааш таслуулахыг санаархлаа ч магад гурван жил хав дарж нам хэвтэх биз.

Ямартай ч 14 мега төсөл, урт хугацааны хөгжлйин баримт бичгээ боловсруулж, Засгийн газрын хөтөлбөр болгон ажиллаж байсан нь маргаангүй үнэн. Тэр хэрээр тэмдгэрч үүр цайна гэдэг шиг ирээдүйд итгэх итгэл иргэдэд төрж байсан нь гарцаагүй.

Тухайлбал, Засгаас хасагдаж байгаа АН-ын сайд нараас Хууль зүй, дотоод хэргийн сайд О.Алтангэрэлд олон нийт ам сайтай байсан. Түүнийг санаачилсан хуулийн төслүүдээ батлуулж чадахгүйд хүрсэнд харамсаж байгаагаа олон нийт илэрхийлж байгаа нь бас үнэн.

Гадаад харилцааны сайд Б.Батцэцэгийг Төрийн тэргүүний хүн гэж тодорхойлох нь бий ч түүний ажиллах арга барил гадаад харилцааг өөр түвшинд хүргэсэн гэдгийг туршлагатай дипломатчид дуу нэгтэй хүлээн зөвшөөрдөг.

Батлан хамгаалахын сайд С.Бямбацогт сайдын хувьд парламентад тав дахь удаагаа сонгогдон ажиллаж байгаа туршлагатай улстөрч. Тэрээр хэд хэдэн байнгын хороо даргалахаас эхлээд бүлгийн дарга, Хууль зүй, дотоод хэргийн сайд, Зам, тээврийн хөгжлийн сайд гээд томоохон албан тушаал хашиж явсны хувиар Батлан хамгаалахын сайдын албыг бардамхан хашиж байгаа. Бас ч гэж батлан хамгаалах салбарт дутагдаж байсан шинэчлэлийг эхлүүлж чадсан.

Зам, тээврийн сайд Б.Дэлгэрсайхан, Аж үйлдвэр, эрдэс баялгийн сайд Ц.Туваан хоёрын гавьяаг Гашуунсухайт-Ганцмод боомтын хил дамнасан төмөр зам, нүүрсний худалдаа, Тавантолгойн нүүрсний уурхайн хүчин чадлыг нэмэгдүүлэх хамтын ажиллагааны тухай Монгол Улсын Засгийн газар болон БНХАУ-ын Засгийн газар хоорондын хэлэлцээрийг соёрхон баталсантай холбож бас болно. Гашуунсухайт-Ганцмод боомтын хил дамнасан төмөр зам, нүүрсний экспортыг нэмэгдүүлэх Засгийн газар хоорондын хэлэлцээр нь Монгол Улсын Засгийн газрын 14 мега төслийн нэгдүгээрт эрэмбэлэгдсэн бөгөөд төмөр замын бүтээн байгуулалтыг 2027 онд багтаан дуусгах учиртай.

Хил холболтын төмөр зам ашиглалтад орсноор Монгол Улсын боомтын хүчин чадал 2 дахин нэмэгдэж, нүүрсний экспорт жилд дунджаар 165 сая тоннд хүрч, нүүрсний борлуулалтын жилийн орлого 1.5 тэрбум ам доллароор нэмэгдэнэ гэж тооцоолсон. Түүнчлэн Шивээхүрэн-Сэхээ, Бичигт-Зүүнхатавч, Ханги-Мандалын боомтууд төмөр замаар үе шаттай холбогдох, баруун, зүүн тэнхлэгийн төмөр замын дараагийн төслүүд хэрэгжих нөхцөл бүрдэх юм.