Бид өмнө нь Ховд аймгийн Буянт сумын Засаг дарга Ж.Бумбаттай холбогдох мэдээллийг хүргэсэн. Энэ удаад мөн тус сумын удирдах албан тушаалтнуудтай холбогдох мэдээллийг хүргэж байна. 

Өмнөх мэдээллийг ЭНД ДАРЖ уншина уу. 

Ховд аймгийн Буянт сумын Иргэдийн Төлөөлөгчдийн Хурлын дарга Р.Дэмбэрэл, нарийн бичгийн дарга Д.Баттулга нар нь 2024 оны 12 дугаар сарын 09-ний өдөр тоног төхөөрөмж худалдан авах зорилгоор захирамж гаргаж, улмаар 2024 оны 12 дугаар сарын 17-ны өдөр “Итгэлт улаач” ХХК болон тус компанийн захирал Б.Баярсайханы данс руу 10 сая 500 мянган төгрөгийг шилжүүлжээ.

Гэвч  “Итгэлт улаач” ХХК нь ИТХ-ын дарга Р.Дэмбэрэлийн авга ахын эзэмшлийн компани бөгөөд энэ нь төрийн албан тушаалтан нь өөрийн хамаарал бүхий этгээдэд давуу байдал бий болгож, ашиг сонирхлын зөрчилтэй шийдвэр гаргасан байж болзошгүйг илтгэж байна.

Ийнхүү худалдан авалт хийхээр зарлага гаргаснаар хойш таван сарын хугацаа өнгөрч байгаа бөгөөд өнөөдрийн байдлаар тоног төхөөрөмж нийлүүлэгдээгүй, мөн мөнгөн хөрөнгө буцаан төлөгдөөгүй байгаа нь төсвийн хөрөнгийг үр ашиггүй, хууль бус байдлаар зарцуулсан гэх хардлагыг төрүүлж байгаа юм.

Энэхүү үйлдэл нь Монгол Улсын Эрүүгийн хуулийн тусгай ангийн 22 дугаар зүйлийн 22.1-д заасан “Эрх мэдэл, албан тушаалын байдлаа урвуулан ашиглах” гэмт хэргийн шинжийг агуулж байгаа бөгөөд  Төсвийн тухай хууль, Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хууль, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулиудыг ноцтой зөрчиж, тус мөнгөөр дамжуулан улсын төсвийн хөрөнгийг завшсан байж болзошгүй байна.