Өнгөрсөн онд УИХ-аар шинэчилсэн найруулгыг нь баталсан Хот, тосгоны эрх зүйн байдлын тухай хуульд өөрчлөлт оруулах тухай Засгийн газраас өргөн мэдүүлсэн хуулийн төслийг УИХ-аар хэлэлцэн баталлаа.

Хуулийн төсөл батлагдсанаар  ирэх зургаадугаар сарын 1-ээс өмнө Дархан, Эрдэнэт, Зуунмод, Хархорум, Багануур, Налайх гэсэн улсын зэрэглэлтэй зургаан хот, орон нутгийн зэрэглэлтэй 43 хот (үүнээс 14-ийг нь нийслэлд), дагуул дөрвөн хот (үүнээс гурвыг нь нийслэлд)-ыг шинэ зохион байгуулалтад оруулах ажил нэг жилээр хойшилж байгаа юм.

Тодруулбал, 2024 оны тавдугаар сард УИХ  “Хот, тосгоны эрх зүйн байдлын тухай” хуулийг шинэчлэн баталж, нийслэлийн дотоод бүтцийг шинэчлэх эрх зүйн орчныг бүрдүүлсэн. Энэ хүрээнд Улаанбаатар хотыг  Хан-Уул, Яармаг, Буянт-Ухаа, Сонгинохайрхан, Баянхошуу, Толгойт, Өнөр, Баянгол, Чингэлтэй, Сэлбэ, Сүхбаатар, Баянзүрх, Дарь-Эх, Амгалан гэх 14 бие даасан хот болгон хуваана.

Эдгээр хотууд тус бүрдээ төрийн үйлчилгээний төвлөрлийг бий болгох, дэд бүтцийн хөрөнгө оруулалт татах, ажлын байр шинээр бий болгох, хот төлөвлөлтийн ухаалаг шийдлүүд нэвтрүүлэх зэрэг зорилт тавьснаар иргэдийн амьдрах орчин, хөдөлгөөний урсгал, төрийн үйлчилгээний хүртээмж илүү тэнцвэртэй болох боломжтой гэж үзэж байсан юм.