“Бадрах Энержи” компанийн хэрэгжүүлж байгаа Зөөвч-Овоо төсөлд хамаарах Хөрөнгө оруулалтын гэрээг өнгөрсөн нэгдүгээр сарын 17-ны өдөр Монгол Улсын Засгийн газар, хөрөнгө оруулагч талтай байгуулсан. Уг гэрээ нь манай улсын хувьд  гуравдагч хөршийн хөрөнгө оруулалт бүхий хоёр дахь хөрөнгө оруулалтын гэрээ болж байгааг эдийн засагчид тодотгодог. Хөрөнгө оруулалтын гэрээгээр Монгол Улс төслийн үр өгөөжийн дийлэнхийг татвар хураамж, АМНАТ болон ноогдол ашгаар дамжуулан төвлөрүүлэх ба төслийн бүтээн байгуулалт барилгын ажлуудаа эхлэх төлөвлөгөөтэй байсан ч иргэдийн эсэргүүцэлтэй тулгараад зогсонги горимд шилжчихээд буй гэхэд хилсдэхгүй. 

“Менежмент Форум”-аас “Бадрах Энержи” компанийг Шилдэг хөрөнгө оруулагчаар шалгаруулж, тус компанийн захирал Марк Мелеард шагналыг гардан авахдаа “Зөөвч-Овоо төслийн хөрөнгө оруулалтыг хөрөнгө оруулагч Орано групп бүрэн хариуцах ба төсөл 1600 шинэ ажлын байр бий болгоно” хэмээн онцолсон ч нутгийн иргэдийн сэтгэлд ирээдүйд итгэх итгэлийн цучил асаасангүй. Уг нь орон нутагт тогтвортой ажлын байр бий болно гэдэг талархууштай үйл явдал.  Гэвч уран эсэргүүцэгч иргэд ураны хор нөлөөгөөр Дорноговь аймгийн Улаанбадрах сумын мал аж ахуйг бүрэн устгаж байна хэмээн уран гэж дуугарсан болгоныг төрийн дайсан, түмнийг хорлогч мэт үзэж, хараасаар өнөөдрийг хүрлээ. Уг хараалын хамгийн том бай нь Физикийн ухааны доктор Н.Тэгшбаяр. Дараагийн бай нь “Бадрах Энержи” компанийн захирал Марк Мелеард. Араас нь Төрийн өмчит “Мон-Атом” компанийн Гүйцэтгэх захирал Д.Далайжаргал гэхчлэн урт жагсаал хөвөрнө. Өнөө дэд захирлын сураг ч алга.

Одоогоор иргэдтэй уулзах үеэрээ заамдуулж маажуулсан “Бадрах Энержи” компанийн захирал Марк Мелеард гомдол гаргаж, малтаж маажсан эмэгтэй цагдаагийн үүд сахиж буй гэх мэдээлэл бий. Үнэндээ Н.Тэгшбаяраас өөр ураны асуудлын талаар ултай суурьтай ойлголт, мэдээлэл өгсөн хүн одоогоор алга. Тэр ч утгаараа “Бадрах Энержи" компанийн дэд захирлаар өнгөрсөн оны сүүлээр томилогдсон Ё.Отгонбаярын байр суурийг сонсохыг хүлээсээр өнөөг хүрлээ гэж үглэгсэд олон байна. 2017-2022 онд Монгол Улсаас АНУ-д суух Элчин сайд, УИХ-ын гишүүн, Боловсрол, соёл шинжлэх ухааны сайдаар ажиллаж байсан эл хүмүүн дипломатч, түүхч мэргэжилтэй юм гэсэн. 
Хотоо харлуулж, цөхрөнгөө бараад нутгаасаа дүрвэж үзлээ. Өрөөл татанхай, уруул ам нь сэтэрхий хүүхдүүд төрж байна. Төр түмэндээ зовлонгоо дэлгэж зөндөө л хэллээ. Улаанбадрах сум устах нь гэх иргэдийн гомдлыг барагдуулах эс бөгөөс эцэслэх хэн ч алга. Гагцхүү уран олборлох эрхийн бичгээ халаасалсан франчуудтай нүүр тулж, ажиллах эрх бүхий цорын ганц монгол хүн болох Ё.Отгонбаярыг ямар нэг хариу үйлдэл үзүүлэх байгаа гэх горьдлого л үлдэж.  Эл эрхэм дээрх албанд томилогдсоноосоо хойш таг чиг, нуувчиндаа бүгсэн мэт таг анир гүм. Гагцхүү “Тусгаар тогтнолын товчоон” гурван ботио гаргаж, “Би улстөрч хүн. Өнөөгийн улстөрчид энэ номыг уншиж үзээсэй. Одоо бид туурга тусгаар улсад юу дуртайгаа хийж амьдарч байна. Тэгэхэд хүний гарт байсан манай удирдагчид өөрийнхөө бодлогыг яаж явуулж чадаж байсан юм бэ бодож үзээсэй” хэмээж байсан нь санаанд тодхон үлдэж. Бас ч гэж багагүй хугацаа өнгөрлөө, албаа авснаас хойш… 
 Угаас мань эр зөөлөн дулаанд дуртай этгээд гэдгийг учир мэдэх хүмүүс хэлдэг. Гэхдээ одоо ил гаралгүй нуувчинд суух цаг биш. Албаа авсан юм бол ажлаа хий.  Асууя албан бусаар, Ё.Отгонбаяр дэд захирлаа… Нуувчнаасаа гарч бид “Бадрах энержи”-тэй хамтрахдаа өөрийнхөө буюу Улаанбадрахын малчдынхаа бүр цаашлаад Монголынхоо эрх ашгийг хамгаалж чадаж байгаа юм уу.
 Эс бөгөөс өөрийн тань хэлснээр хүний гарт байх үедээ улсаа тусгаар болгохын төлөө зүтгэж, амиа өгч чадаж байсан энэ ард түмэн өөрийнхөө эрхэнд байхдаа улсаа сүйдэлж байгааг зүгээр л харж суугаад олон нийтийн телевизээр түүхийн алдаа оноог ярьсаар байх юм уу. Өнөөг дүгнэж, өндөг шидүүлснээс өнгөрсний алдааг шүүх нь илүү хялбар юм уу, таньд… Ирээдүйд өөр нэгэн яг тань шиг өөрийн чинь өндөг шидүүлэхээс айж, аниргүйхэн суусан түүхийг дүгнэх цагийг хүлээх хэрэг байна уу. Хэрэв тийм бол албаа өгөөд асуудлаас алсраад түүхийн шаргал хуудсыг эргүүлдэг ажилдаа шамдвал яасан юм бэ. Таны аниргүйдэл түүхэн шийдэлд хүрчихээд энэ цаг үед ухаарал бус хорлол болчих гээд байна…