Ховд аймгийн Мянгад сумын нутагт Халзан бүрэгтэй хэмээх уул бий. Тус ууланд байгалийн ховор элемент олборлохыг иргэд эсэргүүцээд 10 орчим жил болжээ. Ийнхүү олон жилийн турш нутгийн иргэд тууштай эсэргүүцэж байгаа нь: 

1. "Төрийн тахилгат Алтанхөхий уул, Хар-Ус нуурын дунд орших Халзан бүрэгтэй ууланд газрын ховор элемент олборлож эхэлбэл эндээс үүсэх цацраг идэвхит бодис нь Монголын цэвэр усны ай сав, их нууруудын хотгорт аюул учруулна гэж тэд үзэж байна.  
2. Олборлолт явуулах Халзан бүрэгтэй уул нь Ховд аймгийн хүнсний ногоо тариалдаг гол газруудтай ойрхон. Ховд аймгаас Монгол Улсын зах зээлд жилдээ 50 орчим тэрбум төгрөгийн хүнсний ногоо нийлүүлдэг. Энэ бүс нутгийг цацраг идэвхт бодисоор хордуулбал зөвхөн Мянгад сум төдийгүй Монгол Улсын үндэсний аюулгүй байдалд нөлөөлөх юм. 

Мөн нутгийн иргэдийн ярьж, үзүүлж буйгаар хор хөнөөл нь аль хэдийн мэдрэгдээд эхэлсэн. Ургийн гажигтай төл мал, малын гэдэс дотор болон хээрийн зэрлэг чононы уушиг, элэгийг хүртэл идэхийн аргагүй болтол эрээнтэж, цоохортох болжээ. Зарим амьтад хүртэл устан алга болж эхэлсэн.  Жирэмсэн эмэгтэйчүүд зулбах, амьгүй урхаг төрөх гэх мэт урьд хойчид үзэгдэж байгаагүй тохиолдлууд ихээр гарах болсон нь нутгийн иргэдийг айдаст автуулж байна. 

Энэ талаар манай сурвалжлах баг 2025 оны гуравдугаар сард Ховд аймгийн Мянгад суманд ажиллаж малчид, иргэдийн бодит нөхцөл байдлыг хүргэсэн. Үүний дараах Халзан бүрэгтэй төсөл гэх цахим хаягнаас 2025.03.21-ний өдөр манай байгууллагыг ИЛТЭД ХУДАЛ МЭДЭЭЛЭЛ тараасан хэмээн мэдэгдэл гаргаж, хандалтыг хязгаарлахаар санаархах, сэтгүүлчийн мэргэжлийн үйл ажиллагаанд санаатайгаар саад учруулж, дарамт үүсгэсэн билээ. 

Бид тус мэдэгдлийн дагуу Улсын ерөнхий прокурор, Цагдаагийн байгууллагад хүсэлт гаргаж шалгуулахад "Тус мэдээлэлтэй холбоотой гомдол, мэдээлэл бүртгэгдэж, шалгагдаагүй" гэжээ. Өөрөөр хэлбэл Мянгад сумын малчид, иргэд ургийн гажигтай төл мал төрж байгаа нь Халзан бүрэгтэй төслийн хор уршгаас шалтгаалж байгаа гэж мэдээлсэн нь хуулийн байгууллагаар шалгагдаж, үнэн худал нь тогтоогдоогүй болохыг илхэн харж болно. Харин хуулийн байгууллагын нэр барьж, үнэн эсэх нь тогтоогдсон мэт мэдээлэл түгээж ард иргэдийг төөрөгдүүлэх, хандив тусламж нэрээр авлига ашиг сонирхолын зөрчил гаргаж байгаа "Монголиан нэшнл рийр ийрт корп" ХХК-ийг хуулийн байгууллагад шалгуулах болно.