Өнгөрсөн оны сүүл үеэс ганхаж эхэлсэн Засгийн газар цаашид удаан тэсэхгүй нь бололтой. Үүнтэй холбоотойгоор сайдын суудлын наймаа эд ханцуйн дотроо өрнөж эхэлжээ. Дараагийн Засгийн газарт багтаж, сайдын сэнтийд залрах хүсэлтэй гишүүд хөлийн хурдаар гүйж, ар хударгаар хуйвалдан, тохирч байгааг хэвлэлүүд онцлон мэдээлж эхэлсэн.

Тэгвэл энэ удаад Р.Сэддорж гишүүн журмын анд, намын дарга Л.Гантөмөрийг мөргөж Монгол Улсын Тэргүүн Шадар сайд бөгөөд Эдийн засаг, хөгжлийн сайдаар томилогдохоор тохироо хийж яваад гэрэл цохиулжээ.

Р.Сэддорж гишүүний хувьд “нүүрсний хулгайчид”-ын нэгээр цоллогдож эдүгээ ч АТГ-т шалгуулсаар байгаа. Угтаа бол Р.Сэддорж гишүүний улс төрийн загалмайлсан эцэг, түрийвч нэгтэй гэгдэх Ажнай хочит Д.Бат-Эрдэнэ гэм буруугаа хүлээн зөвшөөрч, улсаас хулгайлсан нүүрсний хохиролоо төлж эхэлсэн байдаг. Тодруулбал 10 гаруй тэрбум төгрөгийн хохиролыг одоогийн байдлаар төлжээ. Ийнхүү Д.Бат-Эрдэнэ гэм буруугаа хүлээн зөвшөөрч, хохиролоо барагдуулаад эхэлсэн байхад туслахаас нь эхлээд "Таван толгой" ХК-ийн захирал, Өмнөговь аймгийн Засаг дарга болтлоо зам, жим нэг явсан Р.Сэддорж харин хуулийн хариуцлага хүлээх нь бүү хэл Улсын Их хурлын гишүүнээр сонгогдон дэвшсэн.

Их хурлын гишүүн болсон нь тус хэргээс мултрах нэг арга гэж бодсон нь онож ямартай ч эдүгээ хүртэл хуулийн хариуцлага хүлээхгүй, гүрийж яваа. Тиймээс хэргээс мултрах барьцаа ахиулахаар өнөөгийн Тэргүүн Шадар сайд бөгөөд Эдийн засаг, хөгжлийн сайд Л.Гантөмөрийг “мөргөхөөр” бүхий л авьяасаа шавхаж явна.