Дулааны дөрөвдүгээр цахилгаан станцад өнгөрсөн гуравдугаар сарын 1-ний өдөр үйлдвэрийн осол гарч 31 настай ээлжийн монтёр Д амь насаа алдсан харамсалтай хэрэг гарсан. Тус хэргийг Баянгол дүүргийн цагдаагийн хоёрдугаар хэлтэст шалгаж байгаад прокурорын байгууллага руу шилжүүлсэн байна. 

Тухайн үед дулааны дөрөвдүгээр цахилгаан станцын гүйцэтгэх захирал Ү.Төмөрхуяг эрх мэдэл, албан тушаалын байдлаа ашиглан ослыг нуун дарагдуулж, талийгаачид эмгэнэл илэрхийлэхийг хүртэл хориглож байсан талаар бид өмнө нь мэдээлж байсан.

Өмнөх мэдээллийг ЭНД дарж үзнэ үү.

Тэгвэл ээлжийн монтёр Д-г амиа алдсан хэрэгт долоон албан тушаалтныг “буруутган” хөдөлмөрийн сахилгын шийтгэл ногдуулжээ.

Тодруулбал, Ерөнхий инженерийн орлогч Р.Ганбат, Зуухан цехийн дарга Д.Ганболд, Хяналтын албаны ХАБЭА-ын хяналтын инженер Г.Чогдон нарт үндсэн цалинг хоёр сарын хугацаагаар 20 хувь бууруулжээ. Харин Зуухан цехийн ХАБ-ын инженер С.Мөнхчулуун, цахилгаан шүүлтүүрийн инженер Д.Загдсүрэн, Хяналтын албаны дарга Д.Өсөхбаяр нарыг 2022.03.31-ний өдрийн гүйцэтгэх захирал Ү.Төмөрхуягийн Б/150 тоот тушаалаар албан тушаалыг бууруулах хөдөлмөрийн сахилгын шийтгэлийг тус тус ногдуулсан байна.

Дулааны дөрөвдүгээр цахилгаан станцын ажилчид эрүүл мэнд болон амь насаараа хохирч буй байдал нь ганц удаагийнх биш юм. Нуун дарагдуулж чадалгүй олон нийтэд ил болсон нь ээлжийн монтёр Д-ийн амиа алдсан хэрэг бөгөөд үүнээс өмнөх болон хойно гарсан ослуудыг гадагш гаргахыг хориглож “хав” дараад өнгөрөөд сурчихсан Ү.Төмөрхуяг захиралд хэн хариуцлага тооцох вэ?

Нийгмийн олон сенсаацинд манай байгууллагын ослууд нам дарагдана гэж ярьдаг, тэрхэн зуур гал намжаахаар албан тушаалтнууддаа хариуцлага тооцсон болоод өнгөрч буй Ү.Төмөрхуяг захирлын энэ үйлдлүүдийг хэзээ таслан зогсоож эрчим хүчний салбарт ажиллах залуус эрүүл мэнд, амь насаараа хохирох айдасгүй ажиллаж болох вэ Н.Тавинбэх сайд аа?