Баян-Өлгий аймгийн Засаг дарга А.Камелият болон Засаг дарга асан Д.Бауыржан, А.Гылымхан нарын 14 хүнийг газар, усны нэрийг хууль бусаар өөрчилсөн гэх үндэслэлээр эрүүгийн хэрэгт буруутган анхан шатны шүүхээр хэлэлцэж буй.

Тэгвэл Баян-Өлгий аймгийн Толбо сумын харьяа, Ховд аймгийн Эрдэнэбүрэн сумын иргэд, малчдын нутагладаг Хашаатын ам гэх газарт алт олборлох бичил уурхай ажлуулж эхэлсэн талаарх мэдээллийг цувралаар хүргэж тухайн тойргоос сонгогдсон УИХ-ын гишүүн Т.Аубакир, Бэйсэн, Баделхан, Ш.Адьшаа, Д.Пүрэвдорж, Зам тээвэр, хөгжлийн сайд С.Бямбацогт нараас тодруулан ажилласан.

Тухайн үед УИХ-ын гишүүн Ш.Адьшаа алт олборлох бичил уурхайн эсрэг тэмцэхээ мэдэгдэж Цагдаагийн ерөнхий газар болон Ховд аймгийн Засаг даргад албан бичиг хүргүүлсэн юм. Тэгвэл Цагдаагийн ерөнхий газрын дарга, хурандаа Г.Сүхболдоос 2023.11.20-ны өдрийн 01/667 тоот албан бичгээр хариуг ирүүлсэн байна.

Албан бичигт “Экологийн цагдаагийн албанаас энэ оны 11 дүгээр сарын 11-16-ны өдрийн хооронд Баян-Өлгий, Ховд аймгийн нутаг дэвсгэрт шалгалтын ажиллагааг зохион байгуулж ажиллаа. Шалгалтын явцад Баян-Өлгий аймгийн Толбо сумын 4 дүгээр багийн нутаг дэвсгэрт байрлах Замтын ам гэх газарт бичил уурхайгаар ашигт малтмал олборлож байгаа “Кенжедара Алтан түлхүүр”, “Мухар Төмөрт” нөхөрлөлүүдийн үйл ажиллагааг зогсоож, Эрүүгийн хэрэг хянан шийдвэрлэх ажиллагаанд заасан үндэслэл журмын дагуу хойшлуулашгүй ажиллагаа явуулан, холбогдох бичиг баримтуудыг хураан авч Цагдаагийн байгууллагын гэмт хэргийн гомдол мэдээллийн Г-450 дугаарт бүртгэлд оруулан мөрдөн шалгах ажиллагааг явуулж байна. Мөн тус сумын Замтын ам гэх газарт эвдэгдсэн 0,0347 га талбайд тус сумын Засаг дарга Н.Еркежан, байгаль орчны хяналтын улсын байцаагч Х.Бахытхан нар Засгийн газрын 2022 оны 296 дугаар тогтоолын 1.6-д заасан “Бичил уурхайгаар ашигт малтмал олборлох үйл ажиллагаанд өмнө нь хөндөгдөөгүй болон нөхөн сэргээлт хийж хүлээлгэн өгсөн газар ашиглуулахыг хориглоно” гэсэн заалтыг зөрчиж “Кенжедара Алтан түлхүүр” нөхөрлөлд 3 га, Мухар Төмөрт нөхөрлөлд 0,6 га, Тэвчээрийн хүч нөхөрлөлд 0,6 га талбайд гэрээ байгуулж, дүгнэлт гаргуулсан болох нь тогтоогдсон.

Дээрх үйлдэл нь Эрүүгийн хуулийн тусгай ангийн 22.1 дүгээр зүйлийн 1 дэх хэсэгт заасан “Нийтийн албан тушаалтан албан үүрэг, бүрэн эрх, албан тушаалын байдлаа урвуулан ашиглаж, бусдад давуу байдал бий болгосн” гэмт хэргийн шинжтэй байх тул Улсын Ерөнхий прокурорын 2020 оны 03 дугаар сарын 24-ний өдрийн А/33 дугаартай тушаалын дагуу Авлигатай тэмцэх газарт шалгах харьяаллыг тогтоолгуулахаар Баян-Өлгий аймгийн прокурорын газарт хүргүүлсэн болно” гэжээ.

УИХ-ын гишүүн Т.Аубакираас алт олборлох бичил уурхайн талаар тодруулахад “ Бүгд хууль ёсны дагуу явж байгаа. Хуулийн дагуу бичиг баримттай тул алт олборлох ёстой. Алт олборлолт хийхгүй бол бид жинхнээсээ алтан дээр суусан гуйлгачин болно” гэдэг тайлбарыг өгч байсан. Харамсалтай нь Баян-Өлгий аймгийн удирдлагууд болон УИХ-ын гишүүн Т.Аубакирын тайлбарыг хуулийн байгууллага үгүйсгэж, холбогдох албан тушаалтнуудыг эрүүгийн хэрэгт холбогдуулан шалгаж эхэлжээ.