Дархан-Уул аймгийн Засаг дарга Б.Азжаргалыг цахим орчинд мэдэхгүй хүн ховор. Уян зөөлөн, ухаалаг, нинжин сэтгэлийн туйл түүнийг нийслэлийн Засаг даргаар томилуулах талаар хүртэл жиг жуг гээд амжсан. 

Түүний хийж байгаа үйлдэл бүр цахим орчинд нийтлэгдэж, уярч, хайлсан уянгын нийтлэл, сэтгэгдэлүүд ар араасаа хөвөрсөөр нэгэнт дасал болчихсон. Олноороо Б.Азжаргал даргыг магтан биширч явдагийн нууц нь тролл буюу хуурамч фэйсбүүк хаягтай намын гишүүдээс бүрдсэн багт байдаг бололтой.

Ингэхдээ 2022.04.18-ны өдрийн 02/07 тоот Дархан-Уул аймгийн Монгол Ардын намын хороо гэсэн дэд дарга С.Ганзоригийн гарын үсэг бүхий албан бичгээр тролл багийг бүрдүүлэх лүндэн буулгажээ.

Тус албан бичигт "Монгол Ардын Намын дүрмийн заалтын дагуу намын гишүүн бүр намын бодлого шийдвэрийг олонд сурталчилан таниулах үүрэгтэй бөгөөд Дархан-Уул аймгийн хэмжээнд сошиал орчинд намын бодлого шийдвэрийг олон нийтэд сурталчилах, түгээн дэлгэрүүлэх ажил хангалтгүй хийгдэж байна.

Иймд аймгийн хэмжээнд намын сонгуульт ажилтан /сумын намын хорооны тэргүүлэгчид, гишүүд, намын анхан шатны дарга, дэд дарга, хяналтын хорооны гишүүн/ бүр өөрийн фэйсбүүк хаягнаас гадна дахин нэг хаягийг нээн хөгжүүлж шаардлагатай мэдээ мэдээллийг олон хүргэхэд анхаарч ажиллах шаардлагатай байна. 

Өгөгдсөн чиглэлийн дагуу хийгдсэн ажлыг хавсралт маягаар 2022.04.25-ны өдөр ирүүлэхийг мэдэгдье" гэжээ.

Үүнээс харахад Дархан-Уул аймгийн Монгол Ардын Намын гишүүд өөрсдийн үндсэн ажлын хажуугаар нам, засагаа магтан дуулах ажлыг хийдэг бөгөөд гүйцэтгэлийн тайлан хүртэл гаргадаг аж.

Ковид-19 цар тахлын улмаас хол хорьж, олон ч иргэний бизнес дампуурч, улс нь хэмнэлтийн хууль баталж эрвийж дэрвийхээрээ бүсээ чангалж байгаа. Засгийн газрын тэргүүн нь хүртэл амаргүй цаг хугацааг туулж байгааг цээжилтэл давтаж байхад Засаг дарга Б.Азжаргалын орлого, эзэмшлийн газар нэмэгдсэнийг АТГ-ын хөрөнгө орлогын мэдүүлгээс харж болно. 

Үүгээр ч зогсохгүй хоёр давхар байшин бариулж, ганцаараа дэд бүтцийнхээ асуудлыг бүрэн шийдчихсэн баримт ч бий.

Болдоггүй бор өвгөн үлгэрт гардаг шиг Б.Азжаргал даргыг Дархан хотыг хөгжүүлээд Засгийн газрын бодлогоо дэмжиж ажиллаарай гээд томилсон уу эсвэл татвар төлөгчдийн мөнгөөр дураараа аашилж сошиал баг ажлуулж хамаг муухайгаа нуучихаад цаагуураа энэ мэт увайгүй үйлдлийг гаргаж, хөрөнгө хураагаарай  гэж томилсон юм уу Л.Оюун-Эрдэнэ Ерөнхий сайдаа.