Нэг хэсэг нь хугацаат цэргийн алба хаагчдаар хамаг хар ажлаа хийлгэж байна гэж шүүмжилдэг. Харин нөгөө талд нь улс орны бүтээн байгуулалтуудын ажилд оролцуулж, тэднийг орлоготой болгож байна гэх.

Он гарснаас хойш цэргүүд улс орны бүтээн байгуулалт бүхий хэд хэдэн ажилд томилогджээ. Тухайлбал, Зүүнбаян-Ханги чиглэлийн бүтээн байгуулалтын ажилд ажиллах үүрэг гүйцэтгэсэн байна. Нийт төмөр замын дөрөвний нэг буюу 25 хувийн доод бүтцийн ажил, 35 километрийн дээд бүтцийн ажлыг бүрэн гүйцэтгэж хүлээлгэн өгсөн гэж албаны хүн онцлов.

Харин өдгөө Засгийн газрын шийдвэрийн дагуу Богдхаан төмөр замын төслийн ажилд оролцож байгаа аж. 

Энэ талаар Зэвсэгт хүчний жанжин штабын даргад нэр дэвшигч бригадын генерал С.Ганбямба “Хугацаат цэргийн алба хаагчдыг бүтээн байгуулалтын ажилд оролцуулж, өөрийн орлоготой болгох боломжийг бүрдүүлж байгаа. Тухайлбал, 2022 онд хугацаат цэргийн 249 алба хаагч Зүүнбаян-Ханги чиглэлийн бүтээн байгуулалтын ажилд оролцож, дээд тал  нь 8.5 сая төгрөгийг хуримтлуулаад аравдугаар сард халагдсан. Цаашдаа улс орныг хөгжүүлэх стратегийн бүтээн байгуулалтын ажилд зэвсэгт хүчний барилга инженерийн цэргийн бие бүрэлдэхүүнийг оролцуулна гэсэн бодолтой байгаа” гэдэг байр суурийг илэрхийлж байв.

Тэгвэл хүүхдээ цэрэгт явуулж буй эцэг, эхчүүд үүн дээр ямар бодол, байр суурьтай байдаг юм бол оо. Бүтээн байгуулалт дээр ажиллаж байгаа цэргүүд амь эрсдэх, бэртэж гэмтэхэд нуун дарагдуулаад өнгөрдөг үү зэрэг олон асуудал цааш хөврөх юм.

Цэргийн эрдэмд хүмүүсээ сургах ёстой. Бүгд эх орноо батлан хамгаалахад бэлтгэгдэх нь зүйн хэрэг. Гэхдээ цэргийн эрдэмд суралцахад заавал барилгын хүнд хүчир ажил хийж, хэн нэгэн ахлах, цолтонгоос айж эмээж, элдэв муугаараа хэлүүлэх ёстой гэж үү.

2019 оноос хойш зэвсэгт хүчний салбар улс орныг хөгжүүлэх бүтээн байгуулалтын ажлуудад идэвхтэй оролцож байгаа гэх. Үүнээс хойш Тавантолгой-Зүүнбаян чиглэлийн төмөр зам, Дорнод аймаг дахь Халх гол сумын хотхоны бүтээн байгуулалтын ажил, Алтанширээ төмөр замын хүнд даацын автомашины замын асуудал, нефтийн үйлдвэрийн бүтээн байгуулалтын ажилд тус тус оролцсон гэдэг мэдээлэл байна. 

Монгол Улсын Ерөнхийлөгч болон Зэвсэгт хүчний ерөнхий командлагчийн зүгээс хугацаат цэргийн хугацаатай холбоотойгоор ажлын хэсгийг зохион байгуулсан. Энэхүү ажлын хэсгийн зүгээс хугацаат цэргийн алба хаагчдын хугацаанд өөрчлөлт оруулах саналыг боловсруулж байгаа юм. Тэгвэл яг хэзээ цэргүүдийн ажиллах, амьдрах нөхцөл, аюулгүй байдалтай холбоотой ажлыг хэсэг гарч, аль аль талаас нь санал боловсруулаад суух вэ?.