Ерөнхий сайд Г.Занданшатар өнөөдөр УИХ-д танилцуулсны дараа УИХ-ын гишүүн Б.Энхбаярыг ХЗДХ-ийн сайдад томилсон захирамжийг гаргасан. Тэгвэл Монгол Улсад нүүрсний болон тендерийн хулгай, авилга нүүрлэсэн хэмээн үзэж байгаа түүний хувьд ХЗДХ-ийн сайд болох л юм бол ширүүн тэмцлийг даруй эхлүүлнэ хэмээн мэдэгдээд байсан. Тэрбээр өнөөдөр ажлаа хүлээж авсан даруйдаа ЦЕГ-ын дарга, бригадын генерал Т.Сүхболдыг үүрэгт ажлаас нь чөлөөлсөнг бид мэдээлсэн. Ерөнхий сайд асан Л.Оюун-Эрдэнийн үед томилогдсон нэг нутгийн хүмүүс мөн хулгай, луйвартай тэмцэж чадаагүй гэсэн үндэслэлээр үүрэгт ажлаас нь чөлөөлсөн бололтой. Тэгвэл ХЗДХЯ-ны харьяа байгууллагуудын удирдлагууд ч мөн ар араасаа солигдох уу гэдэг асуулт урган гарч ирж байна.

ХХЕГ-ын дарга, хилийн цэргийн командлагч, бригадын генерал Ж.Бямбасүрэн, Гадаадын иргэн харьяатын дарга, хурандаа Н.Ууганбаяр, Гаалийн Ерөнхий газрын дарга Р.Отгонжаргал, АТГ-ын дарга З.Дашдаваа нарыг үүрэгт ажлаас нь чөлөөлөх талаар бор шувуу хэдийн жиргэсэн. Түүгээр ч зогсохгүй Төрийн тусгай албан хаагчдын эмнэлгийн дарга Одонгуа үүрэгт ажлаасаа чөлөөлөгдөх дарга нарын жагсаалтад багжээ.

     Албан тушаалаа хашиж байх үедээ эх орон, ард түмний эрх ашгийг нэн тэргүүнд тавин ажиллаж гэмээнэ өргөсөн тангаргаа биелүүлж, Засаг солигдсан ч албаа хашиж үлдэх нэр нүүртэй байх буй за. Ямартай ч шинэ ХЗДХ-ийн сайд дээрх дарга нарыг цаашид гар нийлэхгүй гэж үзсэн үү, алба хаших хугацаандаа хангалтгүй байсан гэж үзсэн үү, эсвэл улс төрийн хувьд өрсөлдөгчдийн үед томилогдсон гэдгийг үндэслэв үү, толгой дараалан чөлөөлөх магадлал тун өндөр яригдаж байна. ХЗДХ-ийн сайд Б.Энхбаяр албан тушаалаа авсан даруйдаа ЦЕГ-ын даргаас нь эхлээд чөлөөлж эхэлсэн нь магадгүй харьяа байгууллагуудын удирдлагуудыг чөлөөлж, шинээр томилох үйл ажиллагааг маш богино хугацаанд хийхээр төлөвлөсөн байсан уу гэдэг асуултанд хүргэж байна.