Эмч нарыг цагаан нөмрөгтэй бурхад гэдэг. Мэдээж олонх нь түмний төлөө гол зогоох төдий гэхэд хилсдэхгүй багахан цалингаар өдөржин шөнөжин эрүүлийг сахин хамгаалах үйлсэд өргөсөн тангаргаа санан, үр хүүхэд, ар гэртээ мартан зүтгэдэг нь ч бас үнэн. Гэвч эмч нарын алдар хүндийг шавар шавхайтай хутгагчид төрийн тусгай албан хаагчдын эмнэлэгт орогносоор буйг холбогдох албаныханд дуулгах нь зүйтэй байх. Тухайлбал ТТАХНЭ-ийн Өдрийн эмчилгээний тасгийн эрхлэгч дэд хурандаа Б.Мөнх-Оч гэж нөхөр байх.

Түүний тухай дуулиан шуугиан ажлын байран дахь архидалтаас аль хэдийнэ хэтэрч, хүчирхийллийн гэмт хэрэгтэй хутгалдсан түүх ч бас сөхөгдөж байна. Эх сурвалжийн өгүүлснээр 2019 оны өвөл буюу дэлхий дайд ковидын хөлд сөхөрчих гэж бужигнаж байх үед тэрбээр эмнэлгийн гал тогооны туслах 20 гаруй настай эмэгтэйд бэлгийн дарамт үзүүлжээ. Дайны хажуугаар дажин гэдэг шиг эл асуудал Чингэлтэй үүргийн цагдаагийн нэгдүгээр хэлтэс хавтаст хэрэг нээгдэн шалгагдаж байсан юм байна. Гэхдээ уг хэрэг 15 сая төгрөг өгснөөр хаагдсан гэдэг.

Нэр төр, итгэл үнэмшил бие цогцосоо 15 сая төгрөгөөр үнэлсэн хохирогч 20 гаруйхан настай бүсгүйг ийм шийдвэр гаргасан тухай дуулаад эмзэглэж байсан ч эл хэрэгт гаднын нөлөөлөл орсон байж магадгүй гэх хардах үндэслэл ч бас байдаг юм байна.

Өөрөөр хэлбэл Б.Мөнх-Очийн эхнэр Б.Түвшинжаргал  хохирогчид 15 сая төгрөгийн хохирол барагдуулах журмаар 15 сая төгрөг өгснөөр хэрэг хаагдсан нь цаанаа давхар дарамт үүсгэсэн байх магадлалтай юм. Учир нь Б.Мөнх-Очийн эхнэр Б.Түвшинжаргал нь Төв аймгийн сум дундын Иргэний хэргийн анхан шатны шүүгчээр ажилладаг гэх утгаараа шууд болон шууд бус утгаараа хэргийг хаахад нөлөөлсөн байх үндэслэлтэй гэж хардаж байна.

Хийсэн хүчирхийллийн хэргээ 15 сая төгрөгөөр хаалгаж чадсан  Б.Мөнх-Очийн хууль бус үйлдэл үүгээр дуусахгүй. Түүнийг томилохын тулд ТТАХНЭ-ийн дарга Н.Одонгуа эмнэлгийн өдрийн эмчилгээний тасгийн эрхлэгч, ахмад Очирчимэгийг хууль бусаар албан тушаал буруулсан байдаг. Очирчимэг холбогдох шат шатны шүүхэд хандаж, хууль бусаар ажлаасаа халагдсан нь тогтоогдож, буцаан ажилд томилох шийдвэр гарсан ч өнөөг хүртэл тасгийн эрхлэгчийн албан тушаалд томилогдож чадахгүй байгаа юм. Ташрамд дуулгахад Н.Одонгуа нь О.Алтангэрэл сайдын үед томилогдсон юм байна билээ.

Н.Одонгуаг оюутан байхаасаа л С.Баярцогтын ивээлд нь багтаж, өдийг хүрсэн гэдгийг улс төрийн хүрээнийхэн ярьдаг. Амрагийн ивээлийг хүртэж албан тушаалд морилсон тэрбээр өөрийгөө хурандаа цолоор шагнан, Алтан гадас одонгоор шагнуулахаар тодорхойлж, шагналд дагалдах 4.5 сая төгрөгийн эмнэлгийн төсвөөс гаргасан гэж эмнэлгийнхэн нь бас л барим тавим ярьдаг. Түүгээр ч барахгүй  Н.Одонгуа дарга найзуудын зугаалгандаа эмнэлгийнхээ түргэний старекс маркийн 80:23 улсын дугаартай машиныг жолооч Амарсанаагийн хамт дайчилсан бөгөөд зугаалгын зардлаа ч ТТАХНЭ-гээс гаргасан гэх юм билээ. Энэ мэтчилэн эх захгүй замбараагүйтэл газар авсан эмнэлгийн удирдлагуудаа эрхэм Б.Энхбаяр сайд анхааралдаа авна уу?