Монгол Улсын Засгийн газар эдийн засгийн тэргүүлэх бодлогын хүрээнд боомтын шинэчлэл, бүтээн байгуулалтын ажлыг эрчимжүүлж, нүүрсний экспортын хэмжээг нэмэгдүүлэх ажлуудыг анхаарч ажиллахаа “амалсан”.  Холын замын тээврийн жолооч нарт давуу тал олгож, жолооч нарын ажиллах орчин нөхцөл тохь муутай, эрүүл аюулгүй байдал, хүний эрхийн асуудал, цалин хөлсний харилцан адилгүй байдлыг цэгцлэнэ ч гэж дуугарсан. Тэр хэрээр хүлээлт үүсэж, том тэрэгний бүхээгт амьдарч буй олон жолооч итгэл найдварын нүдээр өнөөх салбарын сайдаа цоо ширтэн боломж олгох бодит нөхцөлийг хуруу даран хүлээсэн.

Гэвч нөхцөл байдал дээрдсэнгүй. Том тэрэгний монгол жолооч нарын ажил амьдрал хятадын “дүрэм”-ээр өрнөсөөр байна. Шуудхан хэлэхэд,  “Тээврийн үйлчилгээ эрхэлдэг компаниудын тал хувь нь жолооч нартай хөдөлмөрийн гэрээ хийдэггүй. Ажиллаж амьдрах орчин нөхцөлд нь анхаардаггүй. Асуудлыг нь шийдвэрлэж өгдөггүй гэх гомдол цуварсаар л байна.

Ядаж байхад засаг төр үймж, Засгийн газар унах бүрийд тээвэрчид салбарын сайд суудлаа өгвөл санал, санаачлага маань талаар болно гэх айдас тээн түүнийг харуулдсаар өнөөг хүрчээ. Хаа очиж төрд түмэн нүүртэй гэдгэрхүү сайдтан өнөөг хүртэл дэнжигнэж тогтсоор... Даанч ам ажлын зөрүү нь алд дэлмээр хэмжигдэхээр алсарсаар өнөөг хүрлээ. Тухайлбал,  "АТҮТ" ТӨҮГ-ын Замын-Үүд дахь салбарын дарга Д.Болор-Эрдэнэ гэгч нэг нөхөр байх. Мань эрийг Б.Дэлгэрсайханы хүн гэдэг. Тавиул гэсэн үг л дээ. Түүний  гаргаж буй шийдвэр, хандлага бүгд Монгол тээвэрчдийн эсрэг хандлагатай. Монголоо биш хятадыг дэмжих бодлого хэрэгжүүлдэг болсон тухай тээвэрчид шүүмжилцгээж байна. 

Тэр ч бүү хэл үндэслэлгүйгээр хөрөнгөжиж нийслэл хүрээний Зайсанд байр авч, ээжийнхээ ачыг жийп машин бэлэглэн хариулж яваа ажээ. Энэ бүхний эх үндэс нь Монгол компаниудыг хясан боогдуулж, хятад компанийн удирдлагын өмнө мэхийн ёсолж, найр тавьсаны шан харамж юм. Хэдхэн сарын өмнө гурван үсэгтэй газар дуудагдаж, шалгуулах дээрээ тулж явсан түүнийг сугалж гаргасан хүн нь ч нөгөө л нэг Б.Дэлгэрсайхан сайд.

Харин Монголын уул уурхайн томоохон бүсийн чухал албанд тавиулаа тавьсан салбарын сайд, хотод Төрийн ордонд Монгол тээвэрчдээ хэрхэн халамжлан асрах тухай хачин гоё үлгэрээ ярьсаар л сууна... Эцэст нь тэмдэглэхэд ам ажлын зөрүүг тань тэнцвэржүүлэгч тавиулаа авч халах, солих арга хэмжээ авахгүй бол асуудал хэмжээнээс хальж, тээвэрчид тэмцэл хийхдээ тулчихаад байна, сайд аа.