LRT төслийг 2023 оны улсын төсөвт суулгаагүй болохыг Эдийн засгийн хөгжлийн сайд Ч.Хүрэлбаатар мэдэгдээд байсан ч байдал арай өөрөөр эргэсэн талаар бид өмнө нь мэдээлсэн.

Засгийн газраас уг төсөлд батлан даалт гаргахгүй гэдгээ зарласан ч  төслийг зогсоох тухай яриагүй гэж хотын удирдлагууд үзэж буй юм. Өөрөөр хэлбэл, хотын өнөөгийн удирдлагууд Хятадаас их хэмжээний өр тавьж хэрэгжүүлэх нь тодорхой болоод байна.

Мөн төслийн ТЭЗҮ бэлэн болсон, бэлэн болоогүй гэж зөрчилдөх. 2.8 тэрбум ам.долларын өртөгтэй LRT төсөл болон Тавантолгойн цахилгаан станц дээр 565 сая ам.долларын баталгаа гаргах асуудлуудыг нийлүүлээд үзэхээр 3.4 орчим тэрбум долларын асуудал яригдана. Гэтэл энэ нь Монгол Улсын өрийн бодлоготой зөрчилдөх юм.

Тэгвэл 2023 оны улсын төсөвт цахилгаан тээврийн хэрэгсэл нэвтрүүлэх гэдэг зүйл тусчээ. Энэ нь мөн л тооцоо судалгаагүй, хэрэгжүүлэх нөхцөл нь бүрдээгүй хэрнээ төсөвт туссан ажил гэдгийг Аудитын дүгнэлтээс харж болно.

Тайланд,  2023 оны төсвийн төсөлд тусгасан зарим хөтөлбөр, арга хэмжээний хэрэгжилт боломж нөхцөлийг үндэслэлтэй судалж ангилах, эрэмбэлэх ажиллагааг дутуу хийсэн. Ингэснээр ирээдүйд бий болох үр дагавар нь зардлыг улам нэмэгдүүлсэн үр ашиг, үр дүнгүй болгох эрсдэлтэй байна. Тухайлбал, Улаанбаатар хотын түгжрэлийг бууруулах зорилгоор 2023 онд цахилгаан тээврийн хэрэгслийг нэвтрүүлэх ажлыг хугацаанаас нь өмнө хэрэгжүүлэхээр төсөвт тусгасан байна. Цахилгаан автобусны хэрэглээ, цэнэглэх цэгүүдийн байршлыг тодорхойлох, газар чөлөөлөх асуудлыг бүрэн шийдээгүй байгаа нь энэ ажлыг хэрэгжүүлэх нөхцөл бүрдэхгүй байгааг харуулж байна. Мөн дизель автобус худалдан авахаар төлөвлөхдөө орчны нөлөөллийн үнэлгээ хийгээгүй, Евро-5 стандарт шаардлагыг хангаж буй эсэхийг тодорхойлоогүй нь агаарын бохирдлыг бууруулах нэмэлт төхөөрөмж суурилуулах зэргээр зардлыг нэмэгдүүлж болзошгүй юм” гэжээ. 

Шаардлагатай асуудлаа шийдэж чадаагүй байж төсөвт тусгагдсан энэ ажил Эрчим хүчний зохицуулах хороо, Ньюком Групп, “АББ” Групп-тай хамааралтай юу?

2019 оноос Эрчим хүчний зохицуулах хороо, Ньюком Групп, “АББ” Групп хамтран Монгол Улсад орчин үеийн, дэвшилтэт, байгальд ээлтэй, шинэ техник, технологи нэвтрүүлэхээр санамж бичигт гарын үсэг зурсан. Талууд энэхүү санамж бичгээр “Монгол Улсад орчин үеийн, дэвшилтэт, байгальд ээлтэй, шинэ техник, технологи нэвтрүүлэх, цахилгаан тээврийн хэрэгсэл, түүнийг цэнэглэх дэд бүтэц, цахилгаан хураагуурын хэрэглээг судлах, ашиглалтыг турших, хамтын ажиллагааны үр дүн, ашиглалт, судалгааны үр дүн, мэдээллийг харилцан солилцох”-оор тохиролцсон гэх. Санамж бичгийн хүрээнд  Ньюком Групп, “АББ” Групп, Эрчим хүчний зохицуулах хороо нь 100% цахилгаанаар ажилладаг байгальд ээлтэй тээврийн хэрэгсэл, түүний цэнэглэгчийг Монголын эрс тэс уур амьсгалтай цаг уурын нөхцөлд хэрэглэх, ажиглах, турших ажиллагааг албан ёсоор эхлүүлсэн байдаг. Магадгүй энэ ажил төсөвт ШААРДЛАГА ХАНГАХГҮЙГЭЭР тусгагдаж, ийн шүүмжлэл дагуулсан байхыг үгүйсгэхгүй юм.