АТГ-аас өнөөдөр маш ноцтой мэдээллийг олон дэлгэлээ. Тодруулбал, Нийслэлийн түргэн тусламжийн төвийн удирдлага, эмч нар болон Шуурхай удирдлагын төвийн нийт 14 албан тушаалтанд холбогдох хэрэг АТГ-т шалгагдаж байгаа аж. Тодруулбал,  тэд гэртээ нас барсан, өвчний онош тодорхой буюу цагдаагийн байгууллагад шалгуулах шаардлагагүй гэж үзсэн үйлчлүүлэгчийн гэрийн хаягийг буяны компанид өгч, шарилыг хувийн компаниудаар зөөлгөхөд хууль бус давуу байдал олгож байсан гэх. Энэхүү үйлдэлдээ 100 сая төгрөгийн хахууль авсан гэх хэргийг АТГ-т шалгаж дуусаад шүүхэд шилжүүлэх саналтайгаар прокурорын байгууллагад шилжүүлжээ.

Өөрөөр хэлбэл, Нийслэлийн түргэн тусламжийн төвийнхөн дарга удирдлагагүй сүлжээ үүсгэж нас барагсдаар мөнгө хийж байсан. Үүнд нь буяны байгууллагын эрх бүхий албан тушаалтан, ажилтнууд холбогдсон гэх маш ноцтой асуудал өнөөдөр нийгэмд ийн ил гарч байна.

80.000 ам.доллар дамжуулан авч, завшсан хэрэгт яллагдагчаар тооцсон хэрэг ч сөхөджээ

Мөн Нийслэлийн Түргэн тусламжийн төв буюу 103-ын удирдах албан тушаалтнууд болох Т.Пүрэвдаш, Эмчилгээ эрхэлсэн орлогч С.Ариунболд, Автотехникийн албаны ерөнхий инженер Ц.Орхонсүрэн нарыг эхлээд ЭЦА-ны Эдийн засгийн гэмт хэрэгтэй тэмцэх газрынхан шалгаж эхэлсэн байдаг. Тэднийг үндсэн хөрөнгөдөө бүртгэлтэй, яаралтай тусламжийн автомашинуудыг жолооч, эмч нарынх нь хамтаар Монгол, Катарын хамтарсан цэргийн сургуулийн хээрийн эмнэлэгт болон газрын тосны хайгуулын чиглэлээр манай улсад үйл ажиллагаа явуулдаг БНХАУ-ын хөрөнгө оруулалттай “БЖП геофизикал Монголиа” гэх компанид ажиллуулах гэрээ байгуулж, уг компани болон цэргийн сургуулилалтын Катарын талаас байгууллагынхаа дансаар 80.000 ам.доллар дамжуулан авч, завшсан хэрэгт яллагдагчаар тооцсон юм. 2017-2019 онд албан тушаалаа урвуулж, Төсвийн байгууллагын удирдлага, санхүүжилтийн тухай хууль болон Төсвийн байгууллагын зарим ажил, үйлчилгээг гэрээгээр гүйцэтгүүлэх тухай Засгийн газрын 2003 оны 233 дугаар тогтоолыг зөрчин эд хөрөнгө завшсан гэж буруутган шалгаад дуусаж байгаа талаар өдрийн сонинд онцолжээ.