“Шинэ тэнгэр газар” буюу Shincheonji Church of Jesus нэртэй, гаднаа Библи судлалын бүлгийн итгэгчдийн ар гэрийнхэн мэдээлэл хийлээ. Анх 1984 онд БНСУ-д Lee Man-hee гэх хүнээр үүсгэн байгуулагдсан уг бүлгэмийнхэн өөрсдийгөө “шинэ илчлэл авсан жинхэнэ Христийн сүм” хэмээн тодорхойлдог аж. Тус байгууллага манай улсад үйл ажиллагаа явуулаад 10 гаруй жил болсон бөгөөд дэлхийн олон улсын Христийн шашны холбоод, судалгааны байгууллагууд уг хөдөлгөөнийг “гаж урсгал” (сект) гэж үздэг.

Мэдээллээс үзвэл бүлэг нь гишүүдээ гэр бүл, найз нөхөд, нийгмээс тусгаарлах хэлбэрийн сургаал заадаг. Удирдагчийг “илчлэл авсан цорын ганц пастор” гэж шүтүүлдэг төдийгүй элсүүлэхдээ “үнэгүй Библийн хичээл, оюутны судалгааны бүлэг, эсвэл найзын уулзалт” нэрээр жинхэнэ зорилгоо нуудаг гэнэ. Түүнчлэн гишүүдийн амьдрал, мэдээллийг хянах, дарамтлах шинжтэй байдаг итгэгчдийн ар гэрийнхэн мэдээллээ. Түүнчлэн сүмд явсан ээж нь хүүхдүүдээ “Сатаны сүнс“ гэж харааж, өөрийгөө “Мөнх насална“ гэж явсаар өнгөрсөн есдүгээр сард нас баржээ. 

Интернэтээс хайж үзвэл Shincheonji буюу “Шинэ тэнгэр газар” нь Солонгост COVID-19 цар тахлын үед халдвар үүсгэж, төрийн хорио цээрийн дэглэм зөрчсөн хэргээр олны анхааралд өртөж байжээ. Түүнчлэн дэлхийн олон оронд “сургалтын төв” гэх хэлбэрээр дахин бүртгэгдэн, итгэгчдийг элсүүлэх үйл ажиллагаа явуулдаг гэнэ.

Хэдийгээр манай улс Үндсэн хуулиндаа шашин шүтэх эрхийг чөлөөтэй хэмээн тусгасан байдаг ч эл урсгалд хэт автсан гишүүд амиа хорлох, бүлгийн зүгээс дарамтад орох зэргээс болж, өвдөх, нас барах тохиолдол ч байдаг тухай хэвлэлийн хурал зарлагсад дуулгаад эл байгууллагын үйл ажиллагааг хууль хяналтын байгууллага хяналтадаа авахыг хүссэн юм. Мөн уг бүлэг нь итгэгч буюу дагагчдынхаа ар гэр болон үр хүүхэд ойр орчмынхны хувийн мэдээлллийг цуглуулдаг бөгөөд мөнгө угаах гэмт хэрэг үйлдэж байж ч магадгүйг санууллаа.