УИХ-ын чуулганы хуралдаан өнөөдөр /20222.08.30/ үргэжилнэ. Хуралдаанд Ерөнхий сайд Л.Оюун-Эрдэнийн танхимын шинэ сайд нар тангараг өргөх юм. Үндсэн хуулийн нэмэлт, өөрчлөлтийн дагуу танхимын сайд нар давхар дээлтэй байхаар болж, УИХ-ын 10 гишүүн сайдаар томилогдож буй.

Шинэ Засгийн газар нь Ерөнхий чиг үүргийн дөрвөн яам, чиглэлийн 12 сайд, яамгүй тав нийт 21 сайдтайгаар үйл ажиллагаа явуулах юм.

-Яамгүй сайдуудаас Б.Ганбатын нэр эргэлзээтэй байна-

-Шадар сайд С.Амарсайхан. Түүний хувьд өмнөх Засгийн газраас улирч байгаа сайд юм.

-Нийслэл хот, түгжрэлийг бууруулах асуудал хариуцсан сайд Ж.Сүхбаатар

Нийслэлийн авто замын түгжрэлтэй холбоотой асуудал Монгол Улсын хэмжээний асуудал болсон. Нутаг дэвсгэрийн 0.3 хувьд хүн амын 50-иас дээшгүй хувь төвлөрсөн. Хуульдаа ч түгжрэлтэй холбоотой зохицуулалт байхгүй. Засгийн газрын түвшинд төвлөрөлтэй холбоотой асуудал орхигдож ирсэн. Энэ агуулгаар сайд томилж байгаа бололтой.

-Спорт, олимпизм хариуцсан сайд Б.Бат-Эрдэнэ

Монголчууд бөхөө дээдэлдэг ард түмэн. Тэр ч утгаараа зөв л явбал Б.Бат-Эрдэнэ шиг улс төрд өнө удаан оршин тогтнуулж чадна.  Түүнийг спорт хариуцсан сайд болоход элдэв сөрөг коммент үлдээх хүн ховор биз ээ.

Харин Ерөнхий сайдын зүгээс өөрийн ачааг хөнгөлөх хүн гэж тодорхойлсон аж.

Тодруулбал тэрбээр “Спортын салбар үндсэндээ орхигдсон.  Боловсролтойгоо илүү уялдах, зөв хооллолтоос авахуулаад нэгдсэн бодлогоор зохицуулах ийм бүтэц байдаггүй.  Ерөнхий сайд олон асуудал руу ордог. Ийм үзэл санаанаас олимпизмыг ахлах салбар байх нь чухал. Нөгөө талдаа Ерөнхий сайд дээр байдаг Үндэсний хороог яамдад өгөх нь илүү үр дүнтэй. Цаашдаа Ерөнхий сайдын ачааг багасгаж, илүү томоохон бодлого, экспортын асуудалд цагаа зарцуулах боломжтой байх нь улсын эрх ашигт нийцнэ” гэв.

-Боомтын сэргэлтийн хариусан сайд ЗГХЭГ-ын дэд дарга Б.Ганбат

“Боомттой холбоотой асуудлыг ажлын хэсгийн түвшинд авч явж байна. Ажлын хэсэг зөвхөн албан тушаалтнууд хоорондоо хуралдах байдлаар асуудлыг авч явж буй”  гэдэг хатуухан шүүмжлэлийг хэлээд авсан Ерөнхий сайд боомтын сэргэлтийг Засгийн түвшинд хариуцаад явах “эзэн” байх ёстой гэж үзсэн байх.

Ерөнхий сайд Л.Оюун-Эрдэнэ “Боомттой холбоотой экспортын гарцыг нэмэгдүүлэх салбар эзэнгүй байна гэж дүгнэж болох талтай. Тэр агуулгаар ЗГХЭГ-ын түвшний Монгол Улсын сайд, боомтын асуудал хариуцсан үндэсний хорооны дарга гэдэг функт шаардлагатай байна. Цаашилбал, боомтын асуудал эрхэлсэн төрийн захиргааны байгууллагууд дунд салбарын уялдаа холбоог хангах байгууллага зайлшгүй хэрэгтэй байна гэж үзсэн” гэв.

Ч.Хүрэлбаатарын хувьд энэ Засгийн яамдын сайд нарын “толгойлогч”-оор ажиллана

-Эдийн засаг, хөгжлийн сайд Ч.Хүрэлбаатар

Ч.Хүрэлбаатарын хувьд энэ Засгийн яамдын сайд нарын “толгойлогч”-оор ажиллана. Учир нь “Эдийн засгийн хөгжлийн яамыг нэгдүгээр яам болгоно” гээд Ерөнхий сайд өөрөө хэлчихсэн. Түүний  яам бүх яамыг нэгдсэн бодлогоор зохион байгуулах, эхэлж бодлогоо төлөвлөх ажлыг хийнэ. Харин түүнийг нь Сангийн яам санхүүжүүлэх байдлаар явах юм.

Ерөнхий сайдын хэлж буйгаар “Эдийн Засгийн яам бол ДНБ, эдийн засгийг яаж тэлэх вэ, төр хувийн хэвшил, гадаадын хөрөнгө оруулалтын орчныг хэрхэн сайжруулах вэ. "Шинэ сэргэлтийн бодлого"-ын түвшинд яригдаж буй 47 төслийг хэрхэн эрчимтэй урагшлуулах вэ, салбар дундын уялдааг хэрхэн хангах вэ гэх агуулгаар явах шаардлагатай” аж.

-Гадаад харилцааны сайд Б.Батцэцэг

Шинэ Засгийн газарт улирч байгаа хоёр эмэгтэй сайдын нэг Б.Батцэцэг. Түүнийг үлдэхэд нэг ч хүн гайхаж эргэлзсэнгүй. Энэ нь сайд Б.Батцэцэг хэр хэмжээнд ажилласныг илтгэх биз. Монгол Улс олон улсад нэр хүндээ өргөх, олон улсын анхаарлыг татах, хөрөнгө оруулалт, хамтын ажиллагаагаа бэхжүүлэх гэхчлэн улстөрийн зөв тоглолтуудыг тэр хийж чадсан. Нөгөөтэйгүүр жинхэнэ дипломат эмэгтэй гэж ямар хүн байдаг, төрийн айлчлал хэрхэн, яаж явагдах ёстойг үлгэрлэсэн. Ийм зэрэгтэй ажиллаж байгаа хүнийг сольж, урагшаа явж байсан ажлуудыг таг гацаах сонирхол хэнд ч байхгүй биз ээ.

-Сангийн яам Б.Жавхлан

-Хууль зүй, дотоод хэргийн яам Х.Нямбаатар

-Доорх яамдаас Ерөнхийс сайдаас ГАНЦ нь л магтаал сонсов-

Өмнөх Засгийн газраас улирч байгаа сайд нар:

-Байгаль орчин, аялал жуулчлалын сайд Б.Бат-Эрдэнэ

Анх цахимаар, амаар ажлаа явуулахгүй шүү гэдэг сануулгатай сайдын суудалд суусан Б.Бат-Эрдэнэ бусдаасаа арай хожуу томилогдсон. Одоо л нэг ажлынхаа гүн рүү шагайж, гольдролдоо орж байгаа болов уу даа. Угийн үеийн үед уналттай байдаг яам. Арай өөр арга барилаар ажиллах гэж үзээд л байгаа харагддаг юм. Хийх гээд зүтгээд байгааг нь хараад шинэ Засагт үлдээсэн биз ээ. 

-Соёлын сайд Ч.Номин

Ч.Номинг чинээлэг айлын эрх охин гэдгээр нь хүмүүс аль хэдийнэ харахаа больж. Шинийг санаачилж, шинэ салхи татуулж яваа чадварлаг хүн гэж дүгнэж байна.  Анх гишүүн болоод, дараа нь сайд болмогц хүн бүр “энэ годгоносон хүүхэн юу хийж чадах вэ дээ” гэсэн байдлаар харж байсан.  Харин өнөөдөр бол түүний талаар арай өөр зүйл ярих хүн илүү олон болсон биз ээ. Ерөнхий сайд хүртэл “Соёлын салбар яам амжилттай ажиллаж байна” гэдэг ганцхан өгүүлбэр дүгнэлт хэлж сонсогдсон.

-Эрүүл мэндийн сайд С.Энхболд

Хүчээр шахуу сайд болчихов уу даа гэж дүгнэгдэж байсан С.Энхболд өдгөө хэн хүнээс илүү ажиллаж чадаж байна. Эрүүл мэндийн салбарт богино хугацаанд дорвитой шинэчлэлүүд, сайшаалтай ажлууд хийгдэж чадсан. Эрүүл мэндийг дэмжих төв, өрхийн эмнэлгүүдийн үйлчилгээ, ажиллах хүч тодорхой түвшинд ахисан. Бүх шатны эмч, эмнэлгийн ажилчдын ажиллах нөхцөл сайжирч, тоног төхөөрөмжүүдийн шинэчлэлт ч нэлээн хийгдлээ. Тэр эхэлснээ үргэлжлүүлэх, үр дүнгээ үзэх боломжтой болж, энэ Засгийн газарт ажил албаа үргэлжлүүлэн хийнэ.

-Барилга хот байгуулалтын сайд Б.Мөнхбаатар

-Батлан хамгаалахын сайд Г.Сайханбаяр

-Боловсрол, шинжлэх ухааны сайд Л.Энх-Амгалан

-Чиглэлийн яамдын сайд нараас хамгийн их хэл ам дагуулсан нь Д.Сарангэрэл байв-

-Уул уурхай, хүнд үйлдвэрийн сайд Ж.Ганбаатар

Хэдийгээр “дайсан” олонтой ч энэ удаад Ж.Ганбаатарт амжилт хүсэх иргэд олон байна. Ж.Ганбаатарын хувьд  УИХ дахь Эдийн засгийн байнгын хорооны даргаар 2019 онд томилогдож, эдийн засаг, төсөв санхүүтэй холбоотой хуулийн төсөл, тогтоолууд дээр гардан ажиллаж байсан.  Тэгвэл одоо уул уурхайн салбарын хууль эрхзүйн орчныг илүү чамбайруулж, энэ салбарыг гацаанаас гаргах үүргийг тэр Ерөнхий сайдаас хүлээлээ. 

-Хөдөлмөр нийгмийн хамгааллын сайд Д.Сарангэрэл

Ер нь манай Монголчууд эмэгтэй хүн өндөр албан тушаалд томилогдох, амжилттай явахад эрчүүдээс илүү шүүмжилж өөнтөглөх нь их. Тэр утгаараа Д.Сарангэрэл сайд шинэ Засгийн газрын сайд нараас хамгийн их шүүмжлэлийг өөртөө наав. Гэвч цар тахал, ковидтой тэмцэх ажилд цурам алдахгүйн төлөө хичээснийг нь намынхан нь үнэлж байгаа бололтой. Юм хийж байгаа хүнийг л шүүмжилдэг гэдэг шиг цар тахлын хүнд үед Эрүүл мэндийн салбарыг гал алдуулахгүй явсан түүнд дахин итгэл хүлээлгэхэд буруудах юм байхгүй л байх.

-Цахим хөгжил, харилцаа холбооны сайд Н.Учрал

Н.Учралыг угаас энэ яамны сайд болно гэдгийг бүгд л гадарлаж байсан. Тэр ч хийж чадна. Бодлого, хуулийн зохицуулалт гээд бүгдийг нь гаргаад ирсэн хүнтэй хэн юу ярих вэ дээ. Шинэ яаманд анхнаасаа Н.Учрал шиг хүн очвол эхнээсээ зөв гольдролоор явах болов уу гэж нийт масс харж байгаа байх. Харин Ерөнхий сайдын зүгээс “Төрийн албаны анхан, дунд шатны уялдаа холбоо алдагдаж байгаа зэрэг асуудлаар тус яамны чиг үүрэгт өөрчлөлт орох шаардлагатай” гэдэг зүйлийг тодотгов.

-Эрчим хүчний сайд Б.Чойжилсүрэнд Х.Булгантуяа “маш их найдаж байна” гэв

ҮРГЭЛЖЛЭЛ БИЙ...