12 жилийн түүхтэй “Азтай савар амьтанд хайртай залуус” ТББ-аас гэрийн  тэжээвэр амьтад болон тэдгээрийн асра хамгаалагчдад зориулан жил бүр зохион байгуулдаг BePawsitive эвент энэ жил найм дахь удаагаа зохиогдох гэж байна. Энэхүү өдөрлөгийг 2025 оны есдүгээр сарын 13-нд Улаанбаатар хотын Явуугийн цэцэрлэгт хүрээлэнд Чингэлтэй дүүргийн ЗДТГ-ын дэмжлэгтэйгээр зохион байгуулах юм.

Эвентийн үеэр гэрийн тэжээвэр амьтан үрчилж авах, зөв зохистойгоор тэжээх талаар хамгийн үнэн зөв, дэлгэрэнгүй мэдлэгтэй болох, аврагдсан, олдсон “азтай савар”-уудаас үрчлэн авах, мэргэжлийн амьтны эмчээс зөвлөгөө авч, амьтандаа зориулсан үйлчилгээ авах, мэргэжлийн нохой сургагчаас сургалт, хүмүүжлийн зөвлөгөө авах, гэрийн тэжээвэр амьтны тухай хуулийн талаарх мэдээлэлтэй танилцаж, хэрэгжилтэд санал өгөх боломжтой.

Мөн “Хамгийн ганган нохой, муур” шалгаруулах тэмцээнд амьтнаа оролцуулах эсвэл сонирхон үзэх, "Хамгийн адтай амьтан” шалгаруулах хөгжилтэй тэмцээнд сорих Азтай савар” ТББ-ын үйл ажиллагаа болон хэрэгжүүлж буй  “Орон нутгийн гэрийн тэжээвэр амьтдад спэй, засал хийх" төслийн талаар мэдээлэл авангаа Лимо төвийн авьяаслаг нохойнуудын үзүүлбэрийг үзэж, Онцгой байдлын ерөнхий газрын аврагч нохойны түүхийг сонсон, хайртай амьтдаа бусадтай нь танилцуулан, хамтдаа тоглуулаарай.

Түүнчлэн шинэ залуу, авьяаслаг уран бүтээлчдийн дуу, хөгжим сонсож уярах, эвентийг дэмжин оролцож буй байгууллагуудын асарт зочлон, үйлчилгээ авах гэх мэт олон төрлийн үйл ажиллагаанд оролцож, нэгэн өдрийг дурсамжтай, хөгжилтэй өнгөрүүлэх боломжтой.