Ажил үүргээ гүйцэтгэж яваад амиа алдсан ажилтандаа эмгэнэл илэрхийлэхийг хориглодог нь хаанахын ёс вэ? Н.Тавинбэх сайдаа?

Эрчим хүчний салбарт ажиллах нь алхам тутамдаа эрсдэл дагуулж байдаг. Тиймээс л энэ салбарт ажиллаж байгаа хүн нэг бүр дээр хөдөлмөр аюулгүй байдлын дүрэм журмыг ягштал мөрдүүлэх ёстой бөгөөд ягштал мөрдүүлэх, нөхцөл бололцоогоор хангах үүргийг удирдлага хүлээдэг.

Харамсалтай нь энэ салбарт золгүй ослоор залуус амиа алдах тохиоллууд гарч харин үүнийг нуун дарагдуулж, нийгмийн шуугиан дунд мартагдуулаад өнгөрдөг ёс тогтсон гээд хэлэхэд үнэнээс хол зөрөхгүй болжээ.  

Тодруулбал, 2022 оны гуравдугаар сарын 01-ний  өглөө дулааны дөрөвдүгээр цахилгаан станцын ээлжийн монтёр ажилтай Д нь ажлаа хийх явцад осолд орж харамсалтайгаар амиа алдсан. Тус хэргийг Баянгол дүүргийн цагдаагийн хоёрдугаар хэлтэст шалгаж байгаа бөгөөд Мэргэжлийн хяналтын байгууллагаас ослын дүгнэлт гараагүй байгаа аж. 

Ээлжийн монтёр Д нь ажлаа хийж яваад амиа алдсан тул өөрийнх нь даргын суудалд халгаатай байх магадлалтай учир ослыг нуун дарагдуулах үүргийг дулааны дөрөвдүгээр цахилгаан станцын гүйцэтгэх захирал Ү.Төмөрхуяг өгсөн талаар ажилчид нь ярьж байв.

Ажилчид: Ер нь манайх ажлын байрны дарамт ихтэй. Байгууллагынхаа фэйсбүүк групп дотор сэтгэгдэл бичих бүү хэл лайк дарах ч эрх байдаггүй. Удирдлагуудад таалагдахгүй үйлдэл хийвэл группээс хасчихдаг. Бид ядаж ажлынхаа групп дотор талийгаачид эмгэнэл илэрхийлж чадахгүй байна. Улсын онцгой обьект, хагас цэрэгжилтийн байдлаар ажилладаг гэдгээрээ халхавч хийж олон дарамт, шахалтыг ажилчиддаа үзүүлж байна.

Талийгаач нь 31 настай эхнэр, хоёр хүүхдийн хамт амьдардаг байсан. Ид хийж бүтээх насандаа хөдөлмөр аюулгүй байдлын дүрэм, журам алдагдсан орчинд ажилласнаас болж амиа алдсан ээлжийн монтёр Д-д эмгэнэл илэрхийлэх сэтгэлгүй байгаа нь харамсалтай.

Эрчим хүчний салбарт ажиллаж байсан нэгэн нь тэнгэрт дэвшихэд сүүлчийн замд нь хүндэтгэн үдэх сэтгэлгүй удирдлагууд болон Н.Тавинбэх сайд таны хүн ёсны хандлагад эмгэнэл илэрхийлье.

ҮРГЭЛЖЛЭЛ БИЙ...