Дарханы замын тендерт оролцсон Зам тээврийн яамны албан тушаалтнуудын албан өрөө болоод гэрт нь яг одоо нэгжлэг хийж байгаа талаар эх сурвалж мэдээллээ. Ингэхдээ Ерөнхий сайдын үүрэг болгосны дагуу АТГ-аас Дарханы замын тендер сонгон шалгаруулахад оролцсон, сонгосон эрх бүхий албан тушаалтнуудыг шалгаж байгаа гэж мэдээлэв.

Энэ талаар АТГ-аас тодруулахад "Албан ёсны мэдээлэл ирээгүй байна. Тодруулаад эргэн мэдэгдэнэ" гэв.

Дархан-Улаанбаатар чиглэлийн замыг нийтдээ таван хэсэгт хувааж тендер сонгон шалгаруулсан бөгөөд  2 болон 4-р хэсгийг ямар ч түүхгүй буюу тендерийн шаардлага хангахгүй цаасан дээрх компани сонгон шалгаруулсан байж болзошгүй гэнэ. Тус багцын тендерийг 2021 оны нэгдүгээр сарын 21-нээс гуравдугаар сарын 05 хүртэл зарлаж байв.  

Ингээд тендерт БНХАУ-ын компани шалгарсан байдаг. Харин тус компанийн хувьд байгуулагдаад нэг ч ажил хийгээгүй, туршлага, хүн хүч, техникийн боломж муу компани байсан гэдэг мэдээллийг БНХАУ-ын Элчин сайдын яамнаас өгсөн удаатай. 

Чухам яагаад ийм компанийг 100 тэрбум /100,918,500,000 ₮/ гаруй төгрөгийн төсөв өртөгтэй томоохон бүтээн байгуулалтад сонгон шалгаруулсан нь анхаарал татдаг.

Уг замын ажлын тендерийг Зам, тээврийн хөгжлийн яамнаас захиалсан бөгөөд Азийн хөгжлийн банкны хөрөнгө оруулалтаар барьж буй. Харин АХБ-ны зүгээс тендер сонгон шалгаруулалтанд ямар ч оролцоо байгаагүй гэдгээ мэдэгдсэн. 

Хамгийн их хөдөлгөөнтэй, тээврийн хэрэгсэл өдөр шөнөгүй зорчдог гол зам атал олон арван хүний амийг авч одсон "там" болоод удаж буй билээ. Улаанбаатар-Дархан чиглэлийн энэхүү замыг дөрвөн эгнээ болгон өргөтгөж, шинэчлэх шийдвэрийг Засгийн газар 2018 оны есдүгээр сарын 5-ны өдрийн хуралдаанаараа гаргасан байдаг. Нийтдээ 204.11 км замыг хоёр жилийн дотор барьж, 2020 онд ашиглалтад өгөхөөр төлөвлөж байсан. Гэвч өнөөдрийг хүртэл замын ажил 50 хувьдаа ч хүрээгүй нь ийнхүү асуудал дагуулж буй.