“Салбар дундын тархи судлал-2022” олон улсын эрдэм шинжилгээний хурал өнөөдөр эхэллээ.

Уг хуралд оролцож буй эрдэмтэн судлаачид нийт 29 илтгэл танилцуулах юм. Мөн тархи судлалын өнөөгийн хөгжил, цаашдын чиг хандлага, Монгол Улсад тархи судлалыг хөгжүүлэхийн тулд ямар зорилт тавьж ажиллах талаар салбарынхан хэлэлцэж байна. 

Энэ үеэр Монголын Нейросайнсийн нийгэмлэгийн тэргүүн, анагаах ухааны доктор Л.Баттүвшин "Бид багажийн шинжилгээний үр дүнд суурилж, монголчуудын стрессийн түвшинд судалгаа хийсэн. Үүнээс харахад Улаанбаатар хотын гэр хороололд амьдарч байгаа дундаж насны эмэгтэйчүүд хамгийн их стресстэй амьдарч байна гэдгийг судалгааны үр дүн илтгэсэн. Энэ бол багажийн шинжилгээний үр дүнд суурилж хийсэн дүгнэлт.

Багажийн шинжилгээгээр стрессийг хэмжих боломжтой. Өөрөөр хэлбэл, стресст орох үед хүний сэтгэл хөдлөл, бие махбодод огцом өөрчлөлт илэрдэг. Тухайлбал, зүрхний цохилт түргэсэх, тархины цусан хангамж ихсэн гэх мэт.

Ямар нэгэн цацраг туяагаар хордуулалгүй, мэс ажилбар хийхгүйгээр хүний стрессийн түвшинг тогтоож болж байгаа юм. Энэ аргыг ашиглаад үзэхэд, хөдөө орон нутагт амьдарч байгаа хүмүүс Улаанбаатарын гэр хороололд оршин сууж байгаа хүмүүсээс хамаагүй тайван амьдарч байна гэж гарсан.

Мэдээж хөдөө орон нутгаас хотод ирж амьдрах эсэх нь хувь хүний сонголт. Үүнийг хязгаарлаж хориглох эрх хэнд ч байхгүй. Харин стресст хамгийн их өртөж байгаа тэдгээр бүлгийн эрүүл мэндийг дэмжих нь чухал байгаа юм. Бид энэ судалгааг хийхдээ ямар нэгэн асуулт асууж, асуумж бөглүүлээгүй. Тархи судлалын хүрээлэнгээс багажийн шинжилгээний үр дүнд суурилж судалгаа хийсэн" гэсэн юм. 

Түүнчлэн тэрээр тархи судлал бол дэлхийд тэргүүлэх шинжлэх ухаан мөн. Тиймээс цаашид зайлшгүй хөгжүүлэх шаардлагатай гэдгийг онцоллоо.