Сэлэнгэ аймгийн Алтанбулаг сумын Б.Ренчиний нэрэмжит ЕБС-ийн дотуур байрны шатнаас 9 настай охин унаж гэмтсэн хэрэг гарчээ. Охин өнгөрөгч тавдугаар сарын 24-ний өдөр 18:00 цагийн үед тус сургуулийн дотуур байрны шатны хажуугийн бариул дээр хүүхдүүдтэй тоглож байгаад унаж, гэмтэн улмаар өрөөсөн бөөрөө авахуулжээ.

Гэтэл энэ асуудалд сургуулийн захиргаа болон холбогдох хууль хяналтынхан анхаарал хандуулахгүй байгаагаас гадна охины ээжийг гомдол гаргалаа хэмээн цагдаад өгсөн байна.

Энэ талаар охины ээж Я.Уртнасантай холбогдоход "Манайх дөрвөн хүүхэдтэй. Сургуулийн насны гурван хүүхдээ дотуур байранд суулгадаг юм. Хүүхэд маань шатнаас унасан өдөр /2022.05.24/ дотуур байрнаас бидэнд мэдэгдээгүй. Харин том охин маань цаг орчмын дараа залгаж, дүү маань шатнаас хоолоо идэж чадахгүй, бөөлжөөд байна. Би эмчид очиж үзүүлчхээд ирлээ гэж хэлсэн. Тэгээд нөхөр бид хоёр очиж аваад хүүхдээ аваад, Сэлэнгэ аймгийн Нэгдсэн эмнэлэг рүү явсан. Ингээд иртэл Сэлэнгийн эмч нар маань Эх нялхас руу яаралтай цохолт хийж өгсөн. Бүтэн 10 гаруй цаг вагоноор явдаг учраас охин маань замдаа их хүнд байсан. Бөөрний хальс нь задраад, замдаа шээс, цус нь холилдоод маш хүнд ирсэн байна, яаж амьд ирэв ээ гэж эмч нар гайхаад байсан. Тэгээд амь нас нь эрсдэх аюултай байсан тул өрөөсөн бөөрийг нь авах мэс засал хийсэн. Одоо охин маань өрөөсөн бөөргүй, үе үе орондоо шээдэг, шээс нь байнга дусагнадаг, эмчийн зөвлөснөөр хэвтрийн дэглэм барьдаг болсон. Доргих, гүйх зэрэг хөдөлгөөнийг нь хязгаарласан учраас ойр зуур алхаж байгаа" гэв.

Сургуулийн орчинд хүүхэд гэмтэж, эрүүл мэндээрээ хохирно гэдэг яавч эрүүл үзэгдэл биш билээ. Уг хэрэгт дотуур байрны багшийн хараа хяналт сул байдал хамаатай хэдий ч сургуулийн орчинд хүүхдэд ээлтэй орчин бүрдүүлээгүй, аюул эрсдэлтэй орчныг үнэлж, арга хэмжээ аваагүй тухайн сургуулийн удирдлагуудын хариуцлага ч яригдана.

Сургууль бол хүүхдийн аюулгүй байдлыг дээд зэргээр хангаж, хамгийн ээлтэй байх учиртай. Тэрхүү бүсэд хүүхэд эд эрхтнээрээ хохирох нь битгий хэл гартаа өргөс оруулах ч ёсгүй юм.

Тиймдээ ч охины ээж "Сургуулийн орчинд хүүхэд гэмтэж, эрүүл мэндээрээ хохирсон учраас үнэхээр гомдолтой байна. Сургуулийн орчинд, дотуур байранд, камерын өмнө охин минь унаж, өнөөдөр эрүүл мэндээрээ хохирчхоод байхад хэн ч үүнд эмзэглэхгүй байна. Хүүхдийн эрхийг хэн хамгаалах вэ? Хамгаалах ёстой газарт хандмаар байна" хэмээн учирлаж байлаа. 

Тэрээр энэ асуудлаар сургуулийн удирдлагууд, дотуур байрны багш нарт гомдол гаргасан байна. Гэвч түүнийг "Мөнгө нэхэж дарамталсан" хэмээж, эргүүлэн цагдаад өгсөн аж. 

Бяцхан охиныхоо эд эрхтэн, эрүүл мэндээрээ хохирчихоод байхад өөрөө "хэрэгтэн" болж буруутгагдсан тул хэвлэл мэдээлэлд хандсан нь энэ юм.

Охин бэртдэг өдөр сургуулийн зүгээс ар гэрт нь мэдэгдэх бүү хэл эмчид хандаагүй байна. Том охин нь дүүгээ дагуулж очоод үзүүлэхэд Алтанбулаг сумын эмч нар "гайгүй" гээд буцаасан ч хоолоо идэж чадахгүй, бөөлжөөд байсан тул эцэг, эхээ залгаж дууджээ. Ингээд тэд Сэлэнгэ аймгийн Нэгдсэн эмнэлгээс Эх нялхас руу дамжсаар охиныхоо амь насыг аварч чадсан байгаа юм.

Гэсэн ч өнөөдөр эрүүл саруул гүйж байсан охин нь өрөөсөн бөөргүй, хэвтэрт байгаа нь харамсалтай. Энэ асуудлыг Хүүхдийн эрхийн төлөө "За" гэж хэлэхээ андгайлж, хамгаалдаг бүхий л байгууллага, БШУЯ анхааралдаа авч, сургуулийн орчныг шалгах нь зүй биз ээ.