ХӨСҮТ-өөс Зэсвэгт хүчний 123 ангид гарсан сүрьеэгийн голомтын тухай болон бусад цаг үеийн асуудлаар мэдээлэл хийлээ. 

ХӨСҮТ-ийн Эрт сэрэмжлүүлэг, хариу арга хэмжээний нэгжийн дарга О.Сувдмаа "Дэлхий дахинд Ковидын нөхцөл байдал буураагүй, хэвээр байна. 

АНУ-ын бүх мужид Омикроны BA.4, BA.5 хувилбар давамгайлсан хэвээр байна. Түүнчлэн Ази, Европын улс орнуудад ч энэ хувилбар давамгайлж байгаа юм. Үүнтэй холбоотойгоор ДЭМБ болон мэргэжлийн төв байгууллагуудаас энгийн боловч олон төрлийн халдварт өвчнөөс сэргийлэх боломжтой зөвлөмж хүргүүлж байна.

Битүү орчин, олныг хамарсан үйл ажиллагаанд оролцохдоо амны хаалт зүүж, зай барихыг зөвлөе. Аж ахуйн нэгж, албан байгууллага, гэр дотроо чийгтэй болон хуурай цэвэрлэгээг тогтмол хийж хатуу гадаргууг цэвэрлэх хэрэгтэй. Коронавирусээс урьдчилан сэргийлэх энгийн зөвлөмжийг дагаж мөрдөх нь чухал.

Өнөөдрийн байдлаар манай эмнэлэгт 487 өвчтөн хэвтэн эмчлүүлж байна.Тэдгээрийн 328 ковидын халдвараар оношлогдож, эмчлүүлж байна. Эдгээрээс хүндэвтэр буюу уушгины хатгаатай 234, хүнд 46, маш хүнд 6 хүн хэвтэн эмчлүүлж байна. Эмнэлзүйн шинж тэмдгийн хувьд хоолой өвдөх, хуурай ханиалгах, халуурах, үе мөч өвдөх зэрэг зовиур голчлон илэрч байгаа" гэв.

Мөн тэрбээр "Манай эмнэлэг ковидын халдвараар хэвтэн эмчлүүлэх шаардлагатай өвчтнүүдээс гадна бусад халдварт өвчний тохиолдлуудаа хүлээн авч байгаа. Тухайлбал, цусан суулга, гар, хөл, амны өвчин зэрэг гэдэсний халдварт өвчлөлүүдийг цаг алдахгүй хүлээн авч, хэвтэх шаардлагатайг нь давхар авч байгаа. Түүнчлэн ковидын халдвараар давтан халдвар авч байгаа тохиолдлыг тогтмол судалж байна. Ерөнхийдөө 25 орчим хувийг нь давтан халдвар эзэлж байна. 

Давтан халдвар хоорондын хугацаа 190 хоног буюу зургаан сарын давтамжтай байгаа учраас ШУ-ны үндэслэлтэйгээр вакциндаа хамрагдахыг иргэдэд зөвлөж байна" гэх мэдээллийг өглөө.