Барилга, хот байгуулалтын яамнаас улсын төсвийн хөрөнгө оруулалтаар хийж буй барилгын төсөвт өртөг нэмэгдсэнтэй холбоотойгоор мэдээлэл хийлээ.  Тодруулбал, УИХ-аас 2021 оны арваннэгдүгээр сард Монгол Улсын 2022 оны төсвийг баталсантай холбогдуулаад Засгийн газарт хоёр чиглэлээр үүрэг өгсөн байна.

Нэгдүгээрт, үнийн өсөлттэй холбоотой үнийн индексийг батлах, хоёрдугаарт, урьд нь батлагдсан төсөл арга хэмжээний төсөлт өртгийн өөрчлөлтийг тооцож, танилцуулах чиглэл өгөгдсөн байна.  Энэ дагуу БХБЯ 2022 оны долдугаар сарын 1-ний дотор тооцож, танилцуулахаар ажиллажээ.

Энэ хугацаанд 1,122 төсөл, арга хэмжээ жагсаагдаж БХБЯ-нд ирсэн. Эдгээрийг шүүж үзээд 800 гаруйг нь гарцаагүй магадлах, барилгын материалын үнийн өсөлтийг тооцох шаардлагатай гэж үзсэн байна.

Ингээд 534 төсөл, арга хэмжээг магадлаад 2023 оны төсөвт нийт 274.3 тэрбум төгрөг шаардлагатай гэдэг саналыг боловсруулж, Засгийн газрын хуралдаанд танилцуулсан хэмээн тус яамны төрийн нарийн бичгийн дарга С.Магнайсүрэн мэдээллээ.

Үүнийг Засгийн газар дэмжээд УИХ-ын Төсвийн байнгын хороонд танилцуулах чиглэл өгсөн аж. Өөрөөр хэлбэл, барилгын материалын үнэ нэмэгдсэн тул ирэх онд барих барилгын төсөв 273 тэрбумаар нэмэгдэхээр болжээ.