Дэлхийн хамгийн том нисэх буудлуудын нэг Инчёны олон улсын нисэх онгоцны буудалд “Мозо Финанс” гэдэг Монгол компани анх удаа MOZO Café байгуулж, нээлтээ тун удахгүй хийх гэж байгаа юм байна. “MOЗО Финанс” компани нь Монголын хамгийн анхны автомашин MOZO-г үйлдвэрлэгч “Барс Моторс” компанийн санхүүгийн түнш компани бөгөөд 2021 оны 12 сард MOZO виртуаль хөрөнгөд хөрөнгө оруулсан хөрөнгө оруулагчдынхаа хөрөнгө оруулалтыг хамгаалах, өсгөх зорилгоор хилийн чанадад гадаад валют буюу вон болон ам.доллароор орлого олдог, мөн цаашдаа Өмнөд Солонгосын зах зээлд MOZO EVision автомашинаа нэвтрүүлэх чиглэлээр Инчён Интэрншл гэдэг Өмнөд Солонгосын компанийн мэргэжилтнүүдээс зөвлөх үйлчилгээ авч ажиллаад дуусаж байгаа юм байна.

MOZO Café нь цаашдаа виртуал хөрөнгө оруулагчдадаа 50 хувийн хөнгөлөлттэй үнээр үйлчлэхээс гадна Инчёны нисэх буудал болон авиа компанийн ажилчдад ваучераар үйлчлэх ажээ. Орлогын тодорхой хувийг Лотте компанид төлөх бөгөөд зөвхөн кофе төдийгүй архи, согтууруулах ундаагаар үйлчлэх эрхтэй юм байна.

Инчён нисэх онгоцны буудлаар өнөөгийн байдлаар өдөртөө 50 мянган хүн дамжин өнгөрч, үйлчлүүлж байгаа бөгөөд MOZO Café-р дамжуулан хилийн чанадад өөрийнхөө бүтээгдэхүүнийг сурталчлах, борлуулах мөн Монголын аялал жуулчлалыг сурталчлан таниулах ажлуудыг хийх бүрэн боломжтой ажээ.

Зөвхөн 2022 онд гэхэд тус кафе нь 5 сая хүнд хүрэх томоохон сурталчилгааны цэг болж байгаагаараа давуу талтай ажээ. MOZO Café нь 2023 онд Европ болон Азийн хоёр том нисэх онгоцны буудалд салбараа нээх зорилготой ажиллаж байна.

2022 оны 7 дугаар сарын 18 буюу өнөөдрөөс тус кафед ажиллах Англи, Солонгос хэлтэй залуусыг сонгон шалгаруулах ажил эхэлжээ.

Инчён нисэх буудлын тухай

Инчён Олон улсын нисэх онгоцны буудал нь дэлхийн хамгийн том, хамгийн их ачаалалтай онгоцны буудлуудын нэг бөгөөд Зүүн Хойд Азийн зорчигч болон ачаа тээврийн хамгийн том логистикийн төв болдог.

2005-2011 онуудын хооронд Инчён нисэх онгоцны буудал нь Олон улсын нисэх буудлуудын зөвлөлөөс хамгийн шилдэг онгоцны буудлаар тасралтгүй шалгарсан байдаг. Ковид-19 цар тахлын үед ч тус нисэх онгоцны буудал нь 2020 онд хамгийн шилдэг транзит буюу дамжин өнгөрөх нисэх буудлаар шалгарсан бол 2021 онд хамгийн аюулгүй, хамгийн цэвэрхэн бөгөөд хамгийн шилдэг транзит буюу дамжин өнгөрөх нисэх буудлаар шалгарсан юм. 2006-2016 онуудад дараалан Ази Номхон Далайн хамгийн шилдэг нисэх буудлаар 10 жил дараалан тасралтгүй шалгарсан цорын ганц олон улсын нисэх буудал ажээ.

Тус нисэх онгоцны буудалд гольфын талбай, спа, зочид буудал, мөсөн гулгуур, казино, байгууламж доторх ногоон цэцэрлэг, видео тоглоомын газар байхаас гадна Солонгосын соёлыг түгээх зорилгоор музей хүртэл байгуулсан. Өмнөд Солонгос Улс тус нисэх онгоцны буудлыг Солонгосын соёлыг түгээх, аялал жуулчлалыг хөгжүүлэх томоохон түшиц газар болгон ашигладаг билээ.

Тус онгоцны буудлын терминалууд дээр 111 хаалгатай бөгөөд 2019 онд 71 сая хүн дамжин өнгөрсөн бол 2020 онд ковидын улмаас 12 сая хүн болж буурсан боловч 2021 онд ачаа тээврээр дэлхийн хоёр дахь том карго тээврийг дамжин өнгөрүүлсэн нисэх онгоцны буудал болсон байна.

Дэлхийд 2021 онд нийтдээ 4,5 тэрбум хүн онгоцоор ниссэн нь 2019 оныхоос буюу цар тахлын өмнөх үеийнхээс 25 хувь байгаа боловч 2022 онд Инчён нисэх буудлаар өдөртөө 50 мянган хүн үйлчлүүлж байгаа бөгөөд тун удахгүй жилдээ 50 сая хүн үйлчлүүлдэг онгоцны буудал болно гэж таамаглаж байгаа ажээ.