ОУ: Дэлхийн зах зээл дээрх газрын тосны үнэ сүүлийн 4 сарын хугацаанд тасралтгүй өссөөр ирсэн

ОХУ-аас манай улсад нийлүүлэх бүх төрлийн шатахууны импортын хил үнэ дэлхийн зах зээл дэх шатахууны үнэтэй шууд хамааралтай байдаг.  

Энэ оны 06 дугаар сард дэлхийн зах зээл дэх “Брент” төрлийн газрын тосны үнэ баррель нь 110-120 ам.доллароор хэлбэлзэж, дунджаар 118 ам.доллар байгаатай холбоотойгоор ОХУ-ын Роснефть компаниас 2022 оны 07 дугаар сард нийлүүлэх Аи-95 автобензиний импортын хил үнэ өмнөх сараас 81 ам.доллароор нэмэгдэж Аи-95 автобензин 1355 ам.доллар/тонн, Аи-98 автобензин 1405 ам.доллар/тонн, дизель түлшний импортын хил үнэ 200 ам.доллароор нэмэгдэж 1295 ам.доллар/тонн тус тус болоод байна.

 Харин өргөн хэрэглээний Аи-92 автобензиний хувьд 07 дугаар сарын импортын хил үнийг 1285 ам.доллар/тонн-оор ирүүлсэн бөгөөд манай талаас тус шатахууны импортын хил үнэд тодорхой хэмжээний хөнгөлөлт үзүүлэх талаар нийлүүлэгчтэй хэлэлцэж байна. 

Нэмэлт мэдээлэл өгөхөд, Өнгөрсөн 04 дүгээр сард Аи-92 автобензиний импортын хил үнэ 1110 ам.доллар/тонн болж өмнөх сараас 168 ам.доллароор нэмэгдэж тус бүтээгдэхүүний үнэ өсөх нөхцөл байдалд хүрсэн тул УУХҮЯ-наас ОХУ-ын Роснефть компанитай хэлэлцээр хийж, 4,5,6 дугаар саруудад 840 ам.доллар/тонноор буюу 25 хувийн хөнгөлөлтэй үнээр нийлүүлэхээр тохиролцсоны үр дүнд тус шатахууны үнэ өнөөдрийг хүртэл 2390 төгрөгт тогтвортой хадгалагдаж байна.

-Шатахуун түгээх станцууд өчигдөр шөнө 22.00 цагт АИ95 болон дизел түлшний үнээ нэмэв-

Харин өчигдөр шөнө буюу 2022 оны долдугаар сарын 16-ны шөнө 22.00 цагийн үед  АИ95- 4210, дизель түлш -4030 болсон байна. Энэ талаар УУХҮЯ-наас тодруулахад “Маргааш буюу ажлын өдрүүдэд мэдээлэл хийнэ. Нэмэгдсэн нь үнэн” гэдэг тайлбарыг өглөө.