Тулгар төрийн 2230, 2231, Их Монгол Улс байгуулагдсаны 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ой, Үндэсний их баяр наадмын хоёрдахь өдөр бид хүй долоо худагт ажиллав.

Энэ жилийн наадмыг хүн бүр хүсэн хүлээсэн нь бололтой. Үндэсний дээл, хувцсаараа ижилсэн гоёж, Хүй мандлын дэнжийг хотойтол наадав. Газар газрын цуутай хурдан соёолон, дааганы уралдаан болж, наадамчин олноо баясгав.

Мөн анх удаа “Улаанбаатарын үдэш” шоу хотын төв талбайд биш Хүй долоо худагт боллоо. Цаг агаар бороо хургүй, бага зэрэг үүлэрхэг байсан нь наадамчин олонд нэн таатай байлаа. Машины авто зогсоолууд пиг дүүрч, асар майхнууд хүний хөлөөр тасрахгүй, Монгол наадам цогцолбор хурсан олны инээд хөөр, баярын уур амьсгалаар бялхжээ.

Уламжлал ёсоор нийслэлийн дүүрэг бүрээс монгол гэр барьж, иргэдэд үйлчлээд тун завгүй байв. Тэдгээр гэрүүдийг монгол ёс заншил, түүх соёлоо харуулж тулга, авдар, эмээл хазаар, айргийн хөхүүр, хээ угалз бүхий ширээ, үүх түүхээ харуулсан эртний эдлэл хэрэгслээр тохижуулжээ. Гэрээр саатсан зочид баруун талын хананд байрлуулсан дэлгэцээр монгол наадмын утга учир болсон морь, бөхөө мөрий тавин үзээд, тун сэтгэл хангалуун байв. 

Хүй долоо худгийн наадмын нээлтийн ажиллагаа “Соёлын наадам” 14:00  цагт, “Хөхүүрийн айраг наадам” 09:00-18:00 цаг хүртэл тус тус боллоо.

-НИЙТИЙН БИЕ ЗАСАХ ГАЗАР ҮНЭ ТӨЛБӨРГҮЙ-

Энэ жил наадам зохион байгуулагчдын зүгээс нийтийн бие засах газрыг олноор байрлуулж, наадамчдад үнэ төлбөргүй ашиглуулахаар зохион байгуулжээ. Үүнд иргэд ихэд сэтгэл хангалуун байсан төдийгүй орчны хувьд цэвэрхэн, тохилог байсныг онцлох нь зүйтэй болов уу. Нийтийн бие засах газраар хүмүүс үйлчлүүлээд гарах бүрд тогтмол цэвэрлэгээ хийж, ариун цэврийг сахиулж байсан үйлчлэгчид л тэнд хамгийн завгүй нь байв. Энэ мэтчилэн наадмын зохион байгуулалт сайн байгаад, иргэд сэтгэл хангалуун байгаагаа илэрхийлж байлаа