Тулгар төрийн 2230, 2231, Их Монгол Улс байгуулагдсаны 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ой, Үндэсний их баяр наадмын нээлт өнөөдөр Төв цэнгэлдэх хүрээлэнд боллоо.

Цар тахлын улмаас хоёр жил гаруй хугацаанд Монголчууд бид Үндэсний их баяр наадмаа ёслол төгөлдөр тэмдэглэн өнгөрүүлж чадаагүй. Тиймдээ ч энэ жилийн наадмыг хүн бүр хүсэн хүлээсэн үү гэлтэй үндэсний дээл, хувцсаараа ижилсэн, Төв цэнгэлдэхийг дүүргэжээ. Наадмын талбайд түм түжигнэж, бум бужигнан суух зайгүй битүү дүүрсэн байлаа.

Нээлтийг энэ жил найруулагч Н.Наранбаатар найруулж, Улсын драмын театрын бүрэлдэхүүн зохион байгуулсан. Урьд жилүүдийнхтэй харьцуулбал, эртний түүх, соёл, ёс заншлаа илүү дэглэж үзүүлсэн нь наадамчин олонд таалагджээ. Мөн нээлтийн үеэр Ковидын хүнд нөхцөлд цаг наргүй, амралтгүй ажиллаж, амжилттай давж гарсан эрүүл мэндийн салбарын цагаан халаадтай эмч, сувилагчдыг алдаршуулж, хүндэтгэлийн парад алхуулсан нь наадмын нээлтийн онцлох хэсэг байлаа.

Уламжлал ёсоор наадмын хамгийн эрэлттэй бас олж авахад бэрх зүйл нь хуушуур байв.

Хэдийгээр олон тооны асрууд хуушуураар иргэдэд үйлчилж байгаа боловч оочир дараалал ихтэй байсан тул бид ширхэг хуушуур авч чадалгүй буцсан юм. Үнийн хувьд Төв цэнгэлдэхийн хуушуур 2,000 төгрөг, хорхог нэг аяга нь 15,000 төгрөг байв. Мэдээж урьд жилүүдийнхээс үнэтэй боловч амт чанар, махны орц нэмэгдсэн байгааг иргэд хэлж байлаа.

-НИЙТИЙН БИЕ ЗАСАХ ГАЗАР ҮНЭ ТӨЛБӨРГҮЙ-

Энэ жил наадам зохион байгуулагчдын зүгээс нийтийн бие засах газрыг олноор байрлуулж, наадамчдад үнэ төлбөргүй ашиглуулахаар зохион байгуулжээ. Үүнд иргэд ихэд сэтгэл хангалуун байсан төдийгүй орчны хувьд цэвэрхэн, тохилог, зай талбай сайтай байсныг онцлох нь зүйтэй болов уу.

Мөн цар тахлын дараа агаарын хилээ нээснээс хойш манай улсын зорих жуулчдын тоо нэмэгдсэн гэх статистик бий. Үүнийг батлах шиг энэ жилийн наадам гадаадын жуулчид ихтэй байна.  

Түүнчлэн наадамчин олонд үйлчилгээ үзүүлж буй худалдаа эрхлэгчдийн хувьд монгол дээл, хувцас, айраг, цагаа, модон эдлэл, гар урлалын бэлэг дурсгалын зүйлээс эхлээд үндэсний үйлдвэрлэлийн бараа бүтээгдэхүүнээ дэлгэжээ. Үүний зэрэгцээ саравчтай малгай, шүхэр, борооны цув зэрэг цаг агаарын болзошгүй нөхцөлд хэрэглэх зүйлсийг ч худалдаалсан асрууд цөөнгүй байв.

Бас их дээд сургуулиудын төлөөллүүд  парад алхаж, өөрсдийн байгууллагаа сурталчилж байлаа.

Дээрхээс гадна Төв цэнгэлдэх хүрээлэнд наадамчдыг баярлах зуурт ТҮК-ийн ажилтнууд газарт хаясан хог хаягдлыг цэвэрлээд тун завгүй ажиллаж байв.

ТҮК-ийн ажилтан “Иргэд хогоо хогийн саванд хийхгүй, гадна нь хаяад байна. Тамхины ишээ хүртэл хаа хамаагүй хаяж байна. Зориулалтын хогийн сав байхад. Монголчуудаа, хогоо хогийн савандаа хийгээрэй, сайхан наадаарай” гэж ярилаа.

Тиймээс наадамчин олон та бүхэн тэдгээр хүмүүсийн ажил, хөдөлмөрийг хүндэтгэж, хогоо хогийн саванд хийж, цэвэрхэн, эко наадахыг уриалж байна.