Санхүүгийн зохицуулах хорооны дарга асан З.Нарантуяа Тулгар төрийн 2230, 2231 жил, Их Монгол Улс байгуулагдсаны 815, 816 жил, Үндэсний эрх чөлөө, тусгаар тогтнолоо сэргээн мандуулсны 110, 111 жил, Ардын хувьсгалын 100, 101 жилийн ойг тохиолдуулж Монгол Улсын Ерөнхийлөгч У.Хүрэлсүхийн зарлигаар гавьяат хуульч цол хүртсэн юм.

Санхүүгийн зохицуулах хорооны удирдлагууд өчигдөр /2022.07.08/ төрийн дээд цол гардсан шинэхэн гавьяатдаа хүндэтгэл үзүүллээ.

Энэ үеэр Санхүүгийн зохицуулах хорооны дарга Д.Баярсайхан “Санхүүгийн салбарыг хөгжүүлэхэд оруулсан хөдөлмөр зүтгэлд тань талархал илэрхийлэхийн хамт цаашид ч салбарынхаа хөгжил дэвшил, эдийн засагт гүйцэтгэх үүргийг улам нэмэгдүүлэх, бүтээгдэхүүн үйлчилгээний хүртээмжийг дэвшилтэт технологид суурилан өргөжүүлэх, эрсдэлгүй, найдвартай хяналт зохицуулалттай, шударга өрсөлдөөнт зах зээл болгон хөгжүүлэхийн төлөө хамтран ажиллана гэдэгт итгэлтэй байна” гэдгийг онцлоод эрүүл энх, сайн сайхан бүхнийг хүсэн ерөөлөө.

Мөн УИХ-ын гишүүн С.Одонтуяа “Ардчиллын тод өнгө, Улс төрч эмэгтэйчүүдийн имиджийг тодорхойлж Ардчиллын гэрэл болон гялалзаж яваа оюунлаг, хөдөлмөрч манлайлагч бүсгүй  З.Нарантуяа найздаа Монгол Улсын "ГАВЬЯАТ ХУУЛЬЧ" хэмээх эрхэм цолоор шагнуулахаар болсонд халуун баярыг хүргэе.

З.Нарантуяа маань хийсэн ажил, ярих зүйлтэй яах аргагүй шилдэг улс төрч эмэгтэй. Тэр дундаа хууль зүй, эдийн засгийн ухааны салбарт оруулсан түүний гавъяа арвин. Дуудах нэрийг эцэг эх, дурсах алдрыг өөрөө гэдэг тэгвэл Нараа маань эцэг эхийн хайрласан НАР гийсэн ТУЯА цацруулсан сайхан нэрийг үргэлж мандуулан хичээнгүйлэн зүтгэсээр гүйж явна.  Түүнтэй уулзах бүрийд шинэ шийдэл, санаа, гарц бүхнийг эрэлхийлэн энд ч ажил тэнд ч ажил амжуулан бүхнийг хэн нэгний төлөө гэсэн итгэл, сэтгэлээр тэмүүлэн холбон явна.   Улс төрийн адармаатай хэр баргийн эмэгтэй зориглон тэмүүлэхгүй энэ тавилан түүнд оногдсон юм. Төрж өссөн Завхан нутагтаа Ардчиллын галыг бадрааж одоо ч түүчээлсээр явна.

Ардчиллын Нарантуяа, Завханы Нарантуяа, хууль эрх зүй, эдийн засгийн онош тогтоогч, судлаач гээд олон түмэн түүнд хайрласан нэр олон. Энэ бол бусдыг манлайлан, аливаа зүйлд хүлээцтэй хандаж, ажилч хичээнгүй дайчнаар олныхоо дунд явсаных нь төлөө өгсөн алдар нэр. Нүдээ олсон шагнал гэдэг яах аргагүй энэ биз ээ.

Түмэн олны итгэлийг тэнгэр дээш өргөн зүтгэж яваа З.Нарантуяадаа илүү их амжилтыг нийт журмын нөхөд болон бүх эмэгтэйчүүд, ээжүүдийнхээ өмнөөс хүсэн ерөөе” гэжээ. Түүнчлэн Ардчиллын түүхэнд тод өнгө болж буй З.Нарантуяа хэмээн тодорхойлжээ.