Японы Ерөнхий сайд асан Абе Шинзо буудуулж амиа алдсан харамсалтай хэрэг дэлхий нийтийг шуугиулж байна. Өчигдрөөс хойш олон улсын төр засгийн удирдлагууд ээлж, дараалан эмгэнэл илэрхийлсээр байгаа  энэ үед  Монгол Улсын Ерөнхийлөгч Ухнаагийн Хүрэлсүх ч талийгаачийн гэр бүл, японы ард түмэнд эмгэнэл илэрхийлжээ.

Уг эмгэнэлд:

Япон Улсын Ерөнхий сайд агсан Абэ Шинзогийн гэр бүл танаа

Япон Улсын Ерөнхий сайд агсан, Монголын анд нөхөр Абэ Шинзо харамсалтайгаар таалал төгссөнд гүн эмгэнэл илэрхийлье.

Эрхэмсэг ноён Абэ Шинзо агсны Засгийн газраас хэрэгжүүлж ирсэн “Идэвхтэй энх тайванч” гадаад бодлого Япон Улсын олон улс дахь нэр хүнд, нөлөөг өсгөн нэмэгдүүлж, бүс нутгийн хамтын ажиллагааг урагшлуулахад үнэтэй хувь нэмэр оруулж ирснийг бид өндрөөр үнэлдэг.

Абэ Шинзо агсан Монгол, Японы харилцаа, хамтын ажиллагаанд онцгой ач холбогдол өгч, “Эрч”, “Эрч нэмэх” санаачилга дэвшүүлэн Монгол Улсад гурван удаа айлчилсан Ерөнхий сайд гэдгээр түүхэнд бичигдэн үлдсэн юм.

Абэ Шинзо агсныг Ерөнхий сайдаар ажилласан он жилүүдэд Монгол, Японы Стратегийн түншлэлийн харилцаа улам бэхжиж, шинэ шатанд гарсанд Монголын ард түмэн гүнээ талархаж байдаг билээ.

Миний бие Монгол Улсын Ерөнхий сайдын хувиар танай сайхан оронд хоёр удаа айлчлан Ерөнхий сайд Абэ Шинзо агсантай найрсаг дотно танилцан нөхөрлөж, Монгол, Японы Стратегийн түншлэлийн хамтын ажиллагаа болон найрамдалт харилцааг хөгжүүлэхийн төлөө хамтран зүтгэж явснаа эрхэмлэн дурсаж явах болно.

Эх орны маань хөгжилд болон Монгол, Японы харилцаанд түүний оруулсан хувь нэмэр, гавьяа зүтгэлийг Монгол Улс, Монголын ард түмэн үүрд дурсан санах болно.

Гүнээ хүндэтгэсэн,
Монгол Улсын Ерөнхийлөгч Ухнаагийн Хүрэлсүх
2022 оны долдугаар сарын 8-ны өдөр.

Түүнчлэн, Монгол Улсын Ерөнхий сайд Л.Оюун-Эрдэнэ "Монголчуудын анд нөхөр, эрхэм хүмүүн Абэ Шинзо таалал төгссөнд гүнээ эмгэнэн харуусаж байна. Энэ хүнд цаг үед түүний хайртай гэр бүл, найз нөхөд, Японы ард түмэнтэй бид сэтгэл зүрхээрээ хамт байх болно" гэсэн байна.