16:50 цаг

Японы Ерөнхий сайд асан Абе Шинзо нас барсан нь батлагдсан гэж албаны хүмүүс мэдэгдлээ. Ийнхүү тэрбээр зэвсэгт халдлагын золиос болж, 67 насандаа таалал төгслөө. Японы ард иргэд гүнээ эмгэнэн, гашуудаж байна. 

14:40 цаг: Сэжигтэн Японы тэнгисийн цэргийн хүчинд ажиллаж байжээ

Японы Ерөнхий сайд асан Абэ Шинзо баруун зүгийн Нара мужийн гудамжинд буудуулж, эмнэлэгт хүргэгдсэн бөгөөд одоогоор биеийн байдал хүнд хэвээр байна.

Батлан ​​хамгаалахын эх сурвалжийн мэдээлснээр сэжигтэн 2005 оныг хүртэл Японы өөрийгөө хамгаалах Тэнгисийн цэргийн хүчинд гурван жил ажилласан нэгэн ажээ. Тэрбээр экс Ерөнхий сайдад дургүйцэж, түүнийг алах зорилготой байсан гэдгээ мөрдөн байцаалтын үеэр мэдүүлжээ.

13:56 цаг: Шинзо Абэг цээж болон хүзүүндээ буудуулсан гэж NHK мэдээлэв

Эмч нар Японы удирдагч асан Шинзо Абэг "аврахын төлөө тэмцэж байна" гэж Ерөнхий сайд Фумио Кишида хэвлэлийн бага хурал дээр мэдэгдэв. 

Японы Ерөнхий сайд асан Шинзо Абэ цээж, хүзүүндээ буудуулсан байж болзошгүй гэж Японы олон нийтийн NHK телевиз цагдаагийн газраас иш татан мэдээлэв. Японы Ерөнхий сайд Фумио Кишида хэвлэлийн бага хурал дээр хэлэхдээ, Абэгийн биеийн байдал маш хүнд байгаа бөгөөд түүний амийг аврахын тулд эмч нар яаралтай арга хэмжээ авч, эрчимт эмчилгээ хийж байна" гэв.

Кишида болон түүний багийнхан хэвлэлийн бага хуралд нисдэг тэргээр ирсэн гэж NHK мэдээлэв.

13:37 цаг Абэг буудсан хэрэгт сэжигтэн гар хийцийн буу ашигласан гэж NHK мэдээлэв

Японы Ерөнхий сайд асан Абэг буудсан сэжигтэн өөрөө хийсэн бололтой буу ашигласан гэж Японы олон нийтийн NHK телевиз цагдаагийн газраас иш татан мэдээлжээ. 

Сэжигтэн Ямагами Тэцуя нь 40 гаруй настай ба Нара хотын оршин суугч ажээ. Тэрбээр зугтахыг оролдоогүй байна. Түүнийг одоо Нара Ниши цагдаагийн хэлтэст саатуулан шалгаж байна.

13:23 цаг: Абэ Шинзогийн төлөө дэлхийн удирдагчид залбирч байна

Дэлхийн удирдагчид Абэгийн сайн сайхныг хүсч, санаа зовж байгаагаа хуваалцсаар байна. 

АНУ-ын Төрийн нарийн бичгийн дарга Антони Блинкен Бали аралд болсон "Их 20"-ийн бүлгийн Гадаад хэргийн сайд нарын уулзалтын үеэр Индонезийн Гадаад хэргийн сайд Ретно Марсудитай уулзахын өмнө үг хэлэхдээ "гүн харамсаж байна" гэжээ.

Блинкен “Ерөнхий сайд Абэгийн амь насанд халдсан тухай Японоос ирсэн мэдээнд бид хэчнээн их харамсаж, санаа зовж байгаагаа юуны өмнө илэрхийлмээр байна. Бидний залбирал, түүний гэр бүл, Японы ард түмэнтэй хамт байна. Энэ бол маш гунигтай мөч бөгөөд бид мэдээ хүлээж байна" гэжээ.

Австралийн Ерөнхий сайд Энтони Албанезе твиттер хуудсандаа "Ерөнхий сайд асан Абэ Шинзо буудуулсан нь Японоос ирсэн хамгийн цочирдмоор мэдээ байлаа. Энэ үед бидний залбирал түүний гэр бүл болон Японы ард түмэнтэй байна" гэж бичжээ.

Австралийн Ерөнхий сайд асан Скотт Моррисон, Кевин Радд нар Абэтэй нэгэн үе алба хашиж байсан ба тэд мөн үзэл бодлоо илэрхийлжээ. 

"Ерөнхийлөгч Абэ бол Австралийн агуу, ухаалаг найз бөгөөд дайны дараах үеийн дэлхийн хамгийн чухал удирдагчдын нэг юм. Энэ хүнд хэцүү үед бидний залбирал түүнтэй, түүний эхнэр Аки болон Японы ард түмэнтэй хамт байна" гэж Моррисон бичжээ.

Мөн Тайваний Ерөнхийлөгч Цай Ин Вэн ч мөн энэ удаагийн буудлагыг буруушааж, Абэг сайн найз гэж тодотгосон байна.

Мексикийн Гадаад хэргийн сайд Марсело Эбрард твиттер хуудсандаа буун дуу гарсанд гүнээ харамсаж байгаагаа бичжээ. "Бид түүнийг эрүүл мэндийн ноцтой нөхцөл байдлыг даван туулж чадна гэж найдаж байна" хэмээсэн байна.

13:00 цаг

Түүнчлэн Австралийн Ерөнхий сайд асан Малколм Тернбулл залбирч байгаагаа илэрхийлжээ. Тэрбээр Абэгийн халдлагад өртсөн тухай мэдээг сонсоод "аймшигтай" байна. "Абе Шинзо бол манай цаг үеийн агуу удирдагчдын нэг. Яг одоо бид түүнийг давж гарна гэж найдаж, залбирах ёстой" гэж твиттер хуудастаа бичжээ.

Тернбулл нь 2015-2018 онд Австрали Улсын Ерөнхий сайдаар ажиллаж байсан бол Абэ Шинзо мөн тухайн үед Японы Ерөнхий сайдаар ажиллаж байсан билээ.

12:42 цаг

ОЛОН УЛСЫН ХЭВЛЭЛҮҮД АБЭ ШИНЗОГИЙН ӨРТСӨН ЗЭВСЭГТ ХАЛДЛАГЫГ ОНЦОЛЖ БАЙНА

-БИЕИЙН БАЙДАЛ ТОДОРХОЙГҮЙ, ХААШАА Ч ЭРГЭЖ МАГАДГҮЙ БАЙНА-

12:00 цаг

NHK болон Kyodo зэрэг Японы томоохон хэвлэлүүд Абэ Шинзо зүрх нь зогссон байдалтай эмнэлэгт хүргэгдсэн гэж мэдээлсэн. Энэ нь ерөнхийдөө шүүх эмнэлэг болон эмчийн дүгнэлтээр нас барсныг албан ёсоор баталгаажуулахаас өмнө хэрэглэгддэг нэр томъёо юм. Одоогоор биеийн байдал тодорхойгүй, хаашаа ч эргэж магадгүй байна.

Уг халдлагатай холбогдуулан Японы иргэд харамсч байгаагаа хэлээд, хэнийг ч өршөөхгүй хэмээн үзэл бодлоо илэрхийлсээр байна.

Мөн Япон улсад суугаа АНУ-ын Элчин сайд Рахм Эмануэл Абэг буудсан халдлагын дараа "харамсаж, цочирдсон" тухайгаа твиттер хуудсандаа бичжээ. Тэрбээр "Абе-сан бол Японы гарамгай удирдагч бөгөөд АНУ-ын гуйвшгүй холбоотон байсан. АНУ-ын Засгийн газар болон Америкийн ард түмэн Абэ-сан, түүний гэр бүл, Японы ард түмний сайн сайхны төлөө залбирч байна" гэжээ. 

11:35 цаг: ГЭМТ ЭТГЭЭД ХОЁР УДАА БУУДАЖ, АБЭ ЗҮРХ НЬ ЗОГССОН БАЙДАЛТАЙ ЭМНЭЛЭГТ ХҮРГЭДЖЭЭ

Японы ерөнхий сайд асан Абэ Шинзо сонгуулийн сурталчилгаанд оролцож байх үеэрээ буудуулсан талаар олон улсын хэвлэлүүд онцолж байна. Тодруулбал,  түүнийг Нара аймгийн Нара хотод Либерал ардчилсан намаас (LDP) нэр дэвшигчдийг дэмжиж үг хэлж дуусаад, олон нийтэд хандан гараа даллан зам дээр явж байх үед буудалцаан болсон байна. 

Гэмт этгээд түүний араас гар буугаар хоёр удаа буудсан ба нэг нь цээжин тус газарт, нөгөө нь зүүн гарт нь буудсан байна.

Абэ Шинзог яаралтай түргэн тусламжийн нисдэг тэргээр эмнэлэгт хүргээд байна.

Харин гэмт хэрэгтэн 42 настай Ямагами Тэцюүяа гэгчийг  газар дээр нь баривчлаад байна. Мэдээллийг энд дарж үзнэ үү.