Оросууд өөрсдийгөө “орос” гэж хэлэхээсээ ичиж байна...

ОХУ-ын гадаад хэргийн сайд С.В.Лавровын айлчлалыг эсэргүүцэж, Э.Бат-Үүл, Д.Сосорбарам тэргүүтэй нийслэлийн АН-ын зарим гишүүд жагслаа.

Энэ үеэр МУГЖ Д. Сосорбарам “Айдас хүнийг амьдаар нь үхүүлдэг. Чи айж байгаа бол амьд байх хэрэггүй л болж байгаа юм. Чи айдсаа дарж чадаж байгаа бол чи зоригтой хүн. Худлаа эх оронч биш Монголын төлөө юунаас ч айхгүй тэмцэж байгаа эр зоригтон шүү” хэмээн үзэл бодлоо илэрхийлж байв.

Монголыг яагаад ч Оросын суганы үс болгохгүй.

Харин нийслэлийн АН-ын дарга Э. Бат-Үүл “Монголыг яагаад ч Оросын суганы үс болгохгүй. С.В.Лавров тэгж бодож байгаа бол санааны гарз гэдгийг зориуд хэлэх гэж энд ирсэн юм. Монгол эрх чөлөөтэй, нэр төртэй орон. Сүүлийн 30 жилд эрх чөлөөнийхөө амтыг мэдэрч гарсан ард түмэн. Эргэж түүнийг колоничлох гэж, өөрийнхөө бохир үйлдлийн дагуул болгох гэж байгаа бол бид эсэргүүцэн тэмцэх болно. Монголын Путинчүүд зэрлэг аархуу болж буйг иргэд мэдэж байгаа. Гурил цацдаг, зоддог болсон. Путинчүүдээс айхгүй. Монголчууд олуулаа эр зоригтнууд болсон” гэв.

Дуучин, улс төрч Г.Ганхүүгийн хувьд “Саяхан би гадагшаа явж байхдаа нэг ч Орос хүнтэй таарсангүй. Тэд нар нуугдаж байна. Орос хүмүүстэй уулзаад асуухаар “Би Орос биш ээ, Казахстан, Киргизия” гэж байна. Жаахан яриад суухаар “Тийм ээ, би Орос. Гэхдээ Орос гэж хэлэхээс ичиж байна” гэсэн. Нэг хүний тэнэглэлээс болоод бүхэл бүтэн ард түмэн зовж байна. Гадаад хэргийн сайдын өнөөдрийн айлчлалыг хэцүү байдалд орсон тул манай улсад ирлээ гэж харж байгаа. Өмнө нь ямар байдалтай ирж байсан билээ.

Жийнсэн өмдтэй ирж биднийг үл хүндэтгэж байсан. Харин одоо өөр болж, дүрэмт хувцастай ирсэн байна. Энэ бол ганцаардаж байгаагийн илрэл байхгүй юу.

Тэд дэлхийд ганцаардаж байна” хэмээсэн юм.