Нэг хүн хоёроос дээш наадмын тасалбар авах боломжгүй

Үндэсний их баяр наадмыг зохион байгуулах хорооноос өнөөдөр мэдээлэл хийлээ.

Үндэсний их баяр наадмыг зохион байгуулах хорооны гишүүн, ХЗДХЯ-ны Төрийн нарийн бичгийн дарга П.Сайнзориг "Засгийн газрын хуралдаанаар үндэсний их баяр наадмын дүрмүүд батлагдсан. Интернэтээр наадмын тасалбар 400 мянгаар зарна гэсэн мэдээлэл явж байгаа. Үүнийг цагдаагийн байгууллагаас шалгаж байна. Нийт наадмын тасалбарыг долоодугаар сарын 01-ний өдөр цахимаар борлуулсан. Нэг хүн хоёрыг авах боломжтой. Харин зогсоол бол нэг хүн нэг л тасалбар авна. Тагнуулын байгууллага борлуулалт дээр хяналт хийсэн. Төв цэнгэлдэх 12,000 суудалтай. Энэ нь Улаанбаатар хотын нийт иргэдийн 0,07 хувь буюу Монгол улсын нийт иргэдийн 0,03 хувь учраас нээлттэй, хүртээмжтэй байдлаар хангаж, цахимаар борлуулсан. www.enaadam.mn сайт бол цаашид олимпын сайт шиг наадам бүрд ашиглагдаад явна. Энэ сайтыг тусдаа Соёлын яамаар хийлгэж байгаа. Цахим хандалтын ачаалал даах асуудлын хувьд нэг зэрэг 70,000 хүн хандсан байна. Серверийн хувьд ачааллаас болж унахүй. Тасалбар борлуулагдах үед нийт хоёр сая хүн хандахад унаагүй. Үүнийг мөн Цахим хөгжил, харилцаа холбооны яамныхан шалгасан. Ингээд энэ дагуу аж ахуйн нэгжтэй гэрээ хийж ажилласан байгаа. Үндэсний их баяр наадмын зохион байгуулах асуудлыг 2003 оноос хойш хуульчилж ирсэн. Зарим зүйл заалтууд ерөнхий байдлаар байсан тул энэ жил хуулиа шинэчлэн баталсан. Гол өөрчлөлт нь энэ жил баяр наадмыг төрийн байгууллагуудын оролцоотой хийж байгаа. Цаашдаа мэргэжлийн холбоондоо шилжүүлэх асуудлууд яригдана. Бөхийн цол, хурдан морины уралдаантай холбоотой, сурын харваа, үүн дээр шагай харвааны төрлийг албан ёсоор оруулж ирж байгаа. Мөн хурдан морины стандарттай холбоотой асуудлууд оруулсан.

Гадаад бөх одоогийн байдлаар 25 бөх барилдах хүсэлтийг ирүүлсэн. Тува улсын 15, Халимаг дөрөв, Буриад дөрөв, Өвөрмонголын хоёр бөх хүсэлт ирүүлсэн.  Өнгөрсөн долоо хоногийн Засгийн газрын баталсан журмаар бол дөрөв юм уу тавын даваанд Дархан аврага цолтой бөх зодог тайлах хүсэлт гаргавал алдарыг нь хүндэтгэж, тодорхой хэмжээний ёслолын арга хэмжээ буюу цолыг нь дуудаж, цагаан тугандаа мөргүүлж, тойруулан зодгоо тайлж шавь юм уу үр хүүхдэдээ үлдээдэг монгол бөхийн зан үйлийг нь хийе гэдэг санал мөн ирсэн. Өмнө нь бас Түвдэндорж аваргын үед иймэрхүү ёслол хийж байсан удаатай" гэх мэдээллийг өглөө.