Авлигатай тэмцэх газрын Мөрдөн шалгах хэлтэс өнгөрсөн долоо хоногт 7 хэргийг шүүхэд шилжүүлэх, 8 хэргийг хаах, 1 хэргийг харьяаллын дагуу шилжүүлэх саналтай прокурорт хүргүүлэв.

Тухайлбал, Баянхонгор аймгийн Засаг дарга Г.Батжаргал, ИТХ-ын дарга Ц.Отгонбаяр, Хөрөнгө оруулалт, хөгжлийн бодлого төлөвлөлтийн хэлтсийн дарга Д.Ихбаяр нар нь бүлэглэн хахууль өгөгчийн ашиг сонирхлын үүднээс албаны чиг үүргийн хувьд гүйцэтгэх ёсгүй үйлдлийг гүйцэтгэсэн буюу Баянхонгор аймгийн Баян-Өндөр сумын Идрэн 4 дүгээр багийн иргэдийн нийтийн хурлаас болон аймгийн Засаг даргын захирамжийн дагуу байгуулагдсан ажлын хэсгээс дэмжигдээгүй “Хөшөөт” гэх газарт нөхөн сэргээлт хийлгэх, орон нутагт олгох хандив өгүүлэхгүйгээр иргэн “Э”-аас 100,000,000 төгрөгийг хахуульд авсан гэх хэргийг шүүхэд шилжүүлэх саналтайгаар прокурорын байгууллагад шилүүлжээ.

Дээрх нэр бүхий албан тушаалтнууд 2016-2020 онд Баянхонгор аймгийн удирдаж байсан. Тэдэнд холбогдох хэргийг АТГ-ын мөрдөн шалгах хэлтсийнхэн 2019 оноос хойш шалгаад “Эко грийн ланд” ХХК-ийн захирал З.Эвлэгсайханаас 2017 оны зургаадугаар сарын 21-нд 100 сая төгрөгийн хахууль авсныг тогтоосон байдаг.

Г.Батжаргал, Ц.Отгонбаяр нарыг эл хэргээс өмнө буюу 2018 онд газар зохион байгуулалтын нэмэлт төлөвлөгөөнд тусгаагүй газрыг таксины болон худалдаа үйлчилгээний зориулалтаар аж ахуй нэгжүүдэд хууль зөрчин өгсөн, Говь-Алтай, Баянхонгор аймгийн заагт эрх мэдлээ урвуулан ашигт малтмал олборлох зөвшөөрөл олгосон хэмээн буруутган шалгагдаж байсан юм.

Тэднийг Эрүүгийн хуулийн 22.1-3 дахь хэсэгт заасан "Улс төрд нөлөө бүхий этгээд эрх мэдэл, албан тушаалаа урвуулсан"

22.4-6 дахь хэсэгт заасан "Улс төрд нөлөө бүхий албан тушаалтан хахууль авсан"

22.5-1 дэх хэсэгт заасан "Өөртөө, бусдад давуу байдал бий болгох зорилгоор бусдад албаны чиг үүрэг, бүрэн эрх, албан тушаалын байдалтай нь холбогдуулан хахууль өгсөн" гэх үндэслэлээр шалгаж эхэлсэн байдаг.