Хэргийн тухайд тодруулбал, Архангай аймгийн Засаг дарга асан Ц.Мөнхнасан, ИТХ-ын дарга асан Б.Өсөхбаяр нар нь тус аймгийн Цэнхэр сумын 1-р багийн нутагт орших "Шоронгийн ам" нэртэй газрын 5 га талбайд 5 жилийн хугацаатайгаар бичил уурхайн үйл ажиллагаа эрхлэх зөвшөөрөл буюу лицензийг “Тунгалаг тамир-Ар” нөхөрлөлд эзэмшүүлэхдээ албан тушаалын байдлаа урвуулан ашигласан нь хууль, хяналтынхны мөрдөн шалгалтын явцад тогтоогдсон юм.

Хуульд зааснаар газрын ашиглалтын болон хайгуулын лизензын зөвшөөрлийг тухайн аймгийн ИТХ-аар хэлэлцэж, зөвшилцсөний үндсэн дээр олгодог. Гэтэл дээрх нэр бүхий этгээдүүд ИТХ-ын нэрийн өмнөөс “01/369” дугаартай хуурамч тогтоол үйлдэж дээрх зөвшөөрлийг олгосон байдаг.

Түүнчлэн Архангай аймгийн Засаг дарга асан Ц.Мөнхнасан эл хэрэгт холбогдон шалгагдаж байх хугацаандаа буюу 2019 оны наймдугаар сарын 26-27-нд шилжих шөнө ХААИС-ийн Мал аж ахуйн эрдэм шинжилгээний хүрээлэнгийн захирал Т.Батсүхийг зодож, гэмтэл учруулсан хэрэгт холбогдсон удаатай. Мөн л холбогдох шүүх хурал нь хойшилж, цаашлаад прокурорт хэргийг нь буцаасан байх хугацаанд Архангай аймгийн эдгээр удирдлагууд цаг хожсон мэт МАН-аа төлөөлөн аймгийн ИТХ-д нэр дэвшиж байв.

Чухам яагаад Ц.Мөнхнасан, Б.Өсөхбаяр нарт холбогдох хэрэг баримтаар нотлогдсон боловч ийнхүү сунжирч, шүүх, прокурор, АТГ-т ахин дахин буцаж байгаа нь эрхгүй анхаарал татна. Хууль, хяналтынхан үүнд одоогоор тайлбар хийгээгүй байгаа юм.

Баримтаар дэнсэлж, шударга шүүх эсэх нь хавтаст хэргийг дахин гардсан прокурорын шийдвэрээс хамаарах бололтой.