"Элсэлтийн ерөнхий шалгалт 2022"-ын дүн оноог эхний байдлаар нэгтгэж, өмнөх онуудын үр дүнтэй харьцуулсан талаар БҮТ-ийн дарга Л.Ганбат, Боловсролын ерөнхий газрын дарга Т.Ням-Очир нар мэдээлэл хийлээ.

Боловсролын үнэлгээний төвийн дарга Д.Ганбат "Нийтдээ 36 мянган шалгуулагч бүртгүүлсэн. Үүнээс 2872 шалгуулагч ирээгүй. Тэдний нийлэх нь өмнөх оны төгсөгчид байна. Ирц 92 хувьтай байлаа. Газарзүй, Түүхийн хичээлд бага ирцтэй хамрагдсан байна.

Элсэлтийн ерөнхий шалгалтын дүнг хэмжээст оноо руу шилжүүлдэг. Дүн оноог дөрвөн үзүүлэлтээр гаргасан байгаа. Өмнөх 2019 онд 109 шалгуулагч 800 оноо авсан бол 2020 онд 182, 2021 онд 209, энэ онд 208 шалгуулагч 800 оноо авсан байна.

Монгол хэл, бичгийн шалгалтын босго оноонд 1180 шалгуулагч хүрээгүй. Эдгээр шалгуулагчид цар тахлаас шалтгаалан танхимаар хичээллээгүй нөхцөл байдал нөлөөлсөн байж болзошгүй тул дахин боломж олгож наймдугаар сард элсэлтийн ерөнхий шалгалтыг дахин зохион байгуулна.

Элсэлтийн ерөнхий шалгалттай холбоотой 300 орчимд өргөдөл, гомдол ирээд байна. Үүний дийлэнх нь дүн оноогоо хүлээн зөвшөөрөөгүйтэй холбоотой байна.

Энэ тохиолдолд тухайн шалгуулагчийг өөрийг нь байлгаж байгаад машинаар биш гараар тоолох ажлыг хийхээр төлөвлөөд байна.

Мөн харандаа, баллуурын асуудал хөндөгдсөн. Будсан зүйлээ баллуурдахад бага зэрэг толбо үүсэхийг үгүйсгэхгүй. Үүнийг тест уншигч машин унших вий гэдэг эргэлзээ байна. Машин харандааны будалтаас шалтгаалан таниагүй, алдаа заасан тохиолдол нэг ч гараагүй.

Шалгалтын үеэр танхимд гар утсаа ашиглахыг завдсан, өөрийнхөө оронд өөр хүүхэд оруулахыг завдсан зөрчил гарсан. Ийм зөрчил гаргасан хүүхдүүдийн дүн оноог хүчингүй болгосон бол гар утастай холбоотой гурван зөрчлийг шийдвэрлэхээр ажиллаж байна" гэв.

-БАЯН-ӨЛГИЙ АЙМАГТ МОНГОЛ ХЭЛ, БИЧГИЙН ШАЛГАЛТЫГ ДАХИН АВНА-

ЭЕШ-ын босго оноо 480-даа хүрээгүй 5000 орчим хүүхэд байгаа аж. Босго оноогоо давж чадаагүй хүүхдүүдийн хувьд өвөл нэгдүгээр улирлын элсэлтээр их, дээд сургуульд элсэн суралцах боломжтой гэдгийг ч энэ үеэр хэллээ.

Мөн Монгол хэл, бичгийн шалгалтдаа тэнцээгүй 1000 гаруй сурагчийн 50 хувь нь Баян-Өлгий аймгийн сурагчид гэх мэдээлэл бий. Энэ асуудлаар Боловсролын ерөнхий газрын дарга Т.Ням-Очир "Баян-Өлгий аймагт Монгол хэл, бичгийн шалгалтад тэнцээгүй 450 хүүхэд бий. Үүний 70 орчим хүүхэд нь шалгалтад оролцоогүй. 300 гаруй хүүхэд нь босго оноогоо даваагүй. Гэхдээ бусад хичээлийн шалгалтууддаа босго оноогоо давсан сурагчид олон байгаа учраас их, дээд сургуульд элсэх боломжоор хангаж, ирэх наймдугаар сард дахин Монгол хэл, бичгийн шалгалтыг авахаар төлөвлөж байна. Түүнчлэн тус аймгийн Боловсролын газар болон ЕБС-ийн багш, удирдлагуудтай хамтран Монгол хэл, бичгийн бэлтгэгдсэн багш, боловсон хүчний мэдлэг чадварыг сайжруулах, хос хэлний хөтөлбөрийн олон улсын туршлагын дагуу сургалтын агуулгыг сайжруулах ажлыг эхлүүлсэн. Энэ хүрээндээ хүүхдүүдэд сургалт, давтлага өгөх ажлыг зохион байгуулна" гэв.

 Элсэлтийн үйл ажиллагааг одоогоор 88 их сургууль зохион байгуулж байгаа юм байна.