Урин дулааны улирал эхэлж, барилгын ажил эрчимжиж байгаа эдгээр өдрүүдэд амьдралынхаа төлөө ажиллаж, хөдөлмөрлөж байсан идэр насны залуучууд амиа алдсан гэх “гашуун” мэдээлэл ар араасаа хөвөрч байна.  Жил бүрийн өдийд хүний амиар туг тахисан ийм осол хэрэг байнга гарч, байдаг л үзэгдэл мэт хэвшин тогтжээ. Гэтэл барилгын салбарынхны хөдөлмөрийн аюулгүй байдал, стандарт хангалтгүй ажиллагаа,  хариуцлагагүй байдлаас болж  алаг үрс ааваасаа үүрд хагацаж, ачлалт хүүгээ алдсан эцэг эхийн өр эмтэрч, мэгзэм уншиж гашуудаж сууна.

Тиймээс энэ гашуун мэдээг халаглаж, уншаад өнгөрөх биш барилгын компаниудыг хөдөлмөр аюулгүй байдлаа ягштал баримталж, мэргэжлийн хяналтныхны өгсөн шаардлагыг биелүүлж, хариуцлагатай ажилладаг болтол нь  шаардаж, сэрэмжлүүлдэг байх нь зүйд нийцнэ.

Сэрэмжлүүлэг болгох үүднээс хамгийн сүүлд гарсан цөөн жишээг иш татан өгүүлж байна.

Энэ сарын 23-нд “Маршал таун” хотхоны барилгаас өргүүр унаж хоёр хүн гэмтсэний, нэг нь амиа алдаад байна.

 Тэд 37 настай, 35 настай залуучууд байсан.

Тэгвэл уг хэрэг гарахын өмнөх өдөр буюу энэ сарын 22-нд мөн тус дүүргийн 18 дугаар хороонд баригдаж байсан барилгын кран унасны улмаас ажиллаж байсан хоёр хүн амиа алдаж, нэг хүн хүнд гэмтсэн байдаг.

Хохирогчид мөн л идэр насны залуучууд байсан. 

Харин өчигдөр /2022.06.27/ Баянгол дүүргийн 11-р хорооны “Хувьсгалчид”-ын хоёрдугаар гудамжинд байшин барьж байсан хоёр хүн барилгын материалд даруулж нас барсан осол гарсан.

Талийгаачдын нэг нь 24 настай, нөгөө нь 18 настай байсан. 

Мэргэжлийн хяналтын байгууллага дөрөвдүгээр сараас эхлэн барилга угсралтын үйл ажиллагаанд урьдчилан сэргийлэх хяналтыг хийж байгаа гэж буй ч энэ мэт идэр сайхан залуус амиа алдсаар...

Албаныхны өгч буй мэдээллээр хөдөлмөрийн аюулгүй байдал, техникийн аюулгүй байдал хангагдаагүй, холбогдох зөвшөөрөлгүй зэрэг нийт 78 барилга угсралтын үйл ажиллагааг зөрчил арилгах хүртэл түр зогсоожээ. Гэвч хяналт сул, хариуцлага өдөр тутамд алдагдсаар байгааг дээрх хэргүүд гэрчлэх биз.