Авлигатай Тэмцэх Газрын Дэд дарга, эрхэлсэн комиссар Г.Азжаргал, Байгаль орчин, аялал жуулчлалын сайд Б.Бат-Эрдэнэтэй ажлын уулзалт хийж, байгаль орчин аялал жуулчлалын салбар дахь авлигын эрсдэлээс урьдчилан сэргийлэх арга зам, боломж, авлига үүсгэх шалтгаан, нөхцөлийг хэрхэн арилгах талаар ярилцлаа.

Байгаль орчин, аялал жуулчлалын яам “Шударга байдлын үнэлгээ”-ээр өнгөрсөн онд улсын хэмжээнд сүүл мушгисан тул нэлээд олон зүйлийг засаж залруулах шаардлагатайг сайд Б.Бат-Эрдэнэ хэлээд өнгөрсөн таван сарын хугацаанд тусгай зөвшөөрөл хүлээж авах системийг цахимжуулсан, цахимаар ирүүлсэн хүсэлтийн дагуу зөвшөөрлийг олгохдоо хүний нөлөө орохоос сэргийлэхээр ажиллаж байгаа талаар танилцуулав.Богдхан уулын тусгай хамгаалалттай дархан цаазат газар нутагт аялал жуулчлалын зориулалтаар тусгай зөвшөөрөл олгох, аялал жуулчлалын кэмп барина гэж зөвшөөрөл гаргуулаад зориулалтыг нь өөрчлүүлж, орон сууц баригддагаас үүдэн хотын захиргаа ба яам хоёрын дунд зөрчилтэй асуудал үүсээд байгаа. Иймд дархан цаазат төрийн тусгай хамгаалалттай бүсэд газар олгож олон жилийн өмнөөс ужгирсан маргааныг цэгцлэх зэрэг цаашид хууль эрх зүйн талаас хэрхэн засаж сайжруулах боломжийн талаар талууд ярилцлаа.

Авлигатай Тэмцэх Газар 2020 оноос цагдаагийн байгууллагатай хамтарсан ажлын хэсгийн хүрээнд энэ асуудлыг тусгайлан шалгаж эхэлсэн бөгөөд үүнтэй холбоотой эрүүгийн есөн хэргийг АТГ-ын Мөрдөн шалгах хэлтэс харьяаллын дагуу шалгаж байна. Одоогийн байдлаар Богдхан уулын тусгай хамгаалалттай газарт аялал жуулчлалын зориулалтаар 2,800 иргэн, аж ахуйн нэгжид тусгай зөвшөөрөл олгогдсон байна. Үүний 660 орчим нь зөрчилтэй бөгөөд 280 гаруйг нь яамнаас цуцалжээ.

Уулзалтад Авлигатай Тэмцэх Газрын Урьдчилан сэргийлэх, соён гэгээрүүлэх хэлтсийн дарга, эрхэлсэн комиссар Х.Ихмөрөн, Мөрдөн шалгах хэлтсийн албаны дарга, ахлах комиссар М.Даваатогтох нарын албаны хүмүүс оролцов