Нийслэлийн ИТХ-ын ээлжит бус VI хуралдаанаар /2022.06.17/ Нийслэлийн Иргэдийн төлөөлөгчдийн хэлсэн санал, байр сууриас хүргэж байна.

Төлөөлөгч Б.Сүхбаатар “Гэр хороололд газрынх нь үнэ цэнийг өсгөх хэрэгтэй байгаа. Байгаль орчны үнэлгээг нь хиймээр байна. 2009, 2010 онд Баянзүрх дүүргийн 19, 24 дүгээр хороонд үер болж, таван хүний амь эрсдэж байсан. Ахиад ийм эрсдэл учрахгүй байх гэх үндэслэл алга. Гэр хорооллынхон галын аюултай нүүр тулж байна. Тийшээ гал командын машин очиж чадахгүй байна. Энэ эрсдлийг арилгаж, гэр хорооллын газрыг үнэ цэнэтэй болгож, гэр хорооллын шинэчилсэн зохион байгуулалт гэдэг ажлыг хийх шаардлагатай байна. Энэ ажлыг хийхэд төсөв дээр тодорхой хэмжээний мөнгө тавиад,  компани нь шалгарчихсан байхад “энэ зөвхөн зөвлөх үйлчилгээний ажил” байна гээд татаж, хасч байгаа юм байна. Хот суурин газрыг дахин хөгжүүлэх тухай хуулинд гурван ажил байдаг. Нэг нь ашиглалтын шаардлага хангахгүй байгаа орон сууцыг дахин барилгажуулах. Нөгөөх нь гэр хорооллын дахин төлөвлөлт. Гуравдахь нь гэр хорооллын шинэчилсэн зохион байгуулалт. Тэгэхээр шинэчилсэн зохион байгуулалт дээр тавьсан төсвийг ядаж  жишиг байдлаар том хоёр дүүрэг дээр  тавиад өгөх боломж байна уу” хэмээв.