МАН-ын Бага хурал хурав... ­­­­­­­­­Монгол Ардын намын 31 дүгээр Их хурлаас шинээр бүрдүүлсэн уг хуралдаан  "Эрх чөлөөний дөрвөн зам, дөрвөн чөлөөлөлт" гэх уриатай. Бага хурлын шинэчилсэн бүрэлдэхүүн 597 гишүүнтэй бөгөөд II ­­­хуралдаанд 583 гишүүн оролцохоор бүртгүүлсэн гэж байсан ирц 90 хувьтай байсан гэх мэдээлэл бас бий. Ямартай ч хурлын эхэнд намын дарга Н.Учрал, араас нь Монгол Улсын ерөнхий сайд Г.Занданшатар нар илтгэл тавив.  Н.Учрал, Г.Занданшатар хоёрын илтгэлээс ихээ өөр хоёр өнцөг ажиглагдсан. Г.Занданшатарын хувьд тоо худал хэлэхгүй гээд л худлаа хэлээд байна лээ. Эдийн засгийн өсөлт 6,8 хувьд хүрчихээд иргэдийнхээ амьдралд ажиглагдахгүй бол өсөлт гээд юу гэх вэ.

Мань эр Баялгийн хулгайтай тэмцэх “Цэгцрэх хөдөлгөөн”-ий бодит үр дүнд “Эрдэнэс Монгол” нэгдлээс Хуримтлалын санд төвлөрүүлсэн орлого 912 тэрбум төгрөгт хүрч, баялагтаа эзэн байх иргэдийн эрх бодитоор хангагдаж эхэллээ гэж онцолж байгаа дуулдсан. Тоо худал ярьдаггүй гэх тодотголтой нь зэрэгцэн  “Цэгцрэх хөдөлгөөн” эхлэлээ тавиад 2 сар болж байгаа гэх санамж зурсхийснийг нуух юу байх вэ.

УИХ-ын дарга Н.Учралын илтгэлээс “Эрх  чөлөө бол итгэлцэл юм. Эрх чөлөө бол хүч юм. Эрх чөлөө бол ардчилсан нийгмийн амьсгалах агаар юм. Эрх чөлөө бол эмх замбараагүй байдал биш. Эрх чөлөө бол шударга ёс, эв нэгдлийн гагнаас юм” гэх уриа санаанд ойрхон буусан. Магад загатнасан газар маажина гэдэг өнөөгийн нйигэмд үгүйлэгдэж буй өгүүлбэрүүд байснаас тэр байх. Тэрбээр  “Эрх чөлөөний дөрвөн зам, дөрвөн чөлөөлөлт”-өө илтгэлээ хурлын төлөөлөгчдөд танилцуулсан. “Ардын нам ард түмэндээ эргэн ирнэ” гэж 3 сарын өмнө хэлсэн үгэндээ эзэн байхын төлөө энд би зогсож байна гэхэд нь итгэхийг завдсан ч ихээ удалгүй сарниж орхисон.

Түүний санал гаргаснаар Д.Амарбаясгалан, Х.Булгантуяа, Д.Амундра, Н.Тавинбэхийг МАН эгнээнээсээ хассан. Хасалт харин шударга бус явагдсан. Гишүүнчлэлээс хасах нь бүү хэл хөөчихмөөр хүмүсийг үлдээжсэн нь аавын хүүг алагчилж болохгүй гэдэг ардын итгэл үнэмшлийг хөсөрдүүлж орхисон гэсэн үг л дээ. Гэхдээ чөлөөлөгдсөн хоёр гишүүн тун удахгүй УИХ-ын гишүүний бүрэн эрхээ алдана гэж мөрийцсөн ч болно.

Эцэст нь тэмдэглэхэд рейтингийн интервенци гэж ойлголт нэр томъёо байдаг даа. Тэр л харагдлаа. Энгийнчилбэл МАН-ын ил далд удирдлагууд унаж байгаа рейтингээ тогтворжуулж өсөлтийн мөчлөгт оруулах гэсэн арга ядсан концепцио л эхлүүллээ. Гэхдээ МАН рейтингийн өсөлтийн менежментээ маш чадварлаг хийдэг уламжлалтай гэдэгтэй хэн ч маргах билээ…