АНУ-ын есөн муж улсыг дамнан 3700 гаруй км замыг явган туулсан Буддын шашны лам хуврагууд хоёрдугаар сарын 10-ны өдөр Вашингтон хотод хүрэлцэн иржээ. "Энх тайвны төлөөх алхалт" хэмээх энэхүү аялалд нэгдсэн лам нарыг олон мянган хүн баяр хөөр, хүндэтгэлтэйгээр угтан авсан байна.

Гурван сарын өмнө Техас муж улсаас аяллаа эхлүүлсэн лам нар "Энх тайван, хайр, энэрэл нигүүлслийг Америк даяар болон дэлхий нийтэд түгээх" зорилго өвөрлөжээ. Тэд өвлийн тэсгим хүйтэнд хөл нүцгэн алхах зэргээр байгалийн олон бэрхшээлийг даван туулсан байна. Тухайлбал, Охайогийн хөндийгөөс Шинэ Англи хүртэлх нутгийг хамарсан цасан шуурга, тэсгим хүйтнийг үл ажран аяллаа үргэлжлүүлсээр байв.

Аялалд цахим ертөнцөд "Энх тайвны нохой" хэмээн алдаршсан Алока гэх дуудлагатай аврагч нохой нэгджээ. Энэхүү аялал нь АНУ-д цагаачлалын бодлогоос үүдэлтэй хурцадмал байдал нэмэгдэж буй үед  болж буйгаараа онцлог юм.

Олон сая хүн цахим сүлжээгээр дамжуулан лам нарыг дэмжиж байсан бол тэдний аяллын зам дагуух хотуудын иргэд цас, бороог үл хайхран цэцэг барин тэднийг угтаж, хүндэтгэл үзүүлж байв. Вашингтонд Элчин сайдын яамдын гудамжаар лам нарыг алхах үед мөн олон зуун хүн цугларсан байлаа.

"Энх тайвны төлөөх эл аялал бол дэлхий дахинд өрнөж буй эмх замбараагүй байдлаас хэсэгхэн зуур холдуулж, сэтгэл амраасан үйл явдал болж байна" хэмээн Вашингтоны хотын оршин суугч 62 настай Колеман О'Доногью ярилаа. 

Хойд Каролина муж улсын захирагч Жош Стейн лам нарт энх тайван, тэгш байдал, шударга ёс, нинжин сэтгэлийн мессежээрээ, олон сая хүнд итгэл найдвар бэлэглэсэнд талархал илэрхийлжээ. Сүмд болсон ёслолын үеэр Колумбийн тойргийн төрийн нарийн бичгийн дарга Кимберли Бассетт Вашингтон хотын дарга Мюриэл Баузерын нэрийн өмнөөс лам нарт хүндэтгэлийн тунхаг гардуулсан байна. "3700 гаруй км-ийн аялал өнөөдөр дуусаж болох ч энх тайвны төлөөх бидний аялал зогсолтгүй үргэлжилсээр байх болно. Та бүхний мөргөлийн аялал хот, муж улсууд, нийгмийн янз бүрийн бүлгийн хүмүүсийг нэгтгэлээ" гэж К.Бассетт онцлон хэлжээ.

Гэвч лам нарын аялал дардан байсангүй. Техас муж улсын Дэйтон хотоор дайран өнгөрөх үед дагалдан явсан машиныг нь ачааны тэрэг мөргөсний улмаас хоёр лам хүнд бэртэн, нэг нь хөлөө тайруулсан харамсалтай явдал гарчээ. Гэсэн хэдий ч тэд осолд өртсөн нөхдөө, энх тайвны үйл хэргийг хүндэтгэн аяллаа зогсоолгүй үргэлжлүүлсэн байна.