Энэ онд хиймэл оюуны (AI) технологид нийлээд 660 орчим тэрбум ам.долларын хөрөнгө оруулах төлөвлөгөөгөө танилцуулсны дараа технологийн томоохон компаниудын хувьцааны ханш огцом унасан тухай Financial Times сонинд мэдээлжээ.

Шинжээчдийн таамаглаж буйгаар, зөвхөн Amazon, Google, Microsoft компаниуд сүүлийн долоо хоногт улирлын тайлангаа нийтэлсний дараагаар нийлээд 900 тэрбум ам.долларын зах зээлийн үнэлгээгээ алдах магадлалтай байна. Хөрөнгө оруулагчид корпорацуудын санал болгож буй "капиталын зардлын гайхалтай төслүүдэд" сэтгэл дундуур байгаа бөгөөд эдгээр төсөл нь 2025 оныхоос 60 хувиар өсөж, Израил зэрэг орнуудын ДНБ-ээс давна гэж тооцоолж байна.

Компаниудын жилийн нийт орлого 14 хувиар өсөж, 1.6 их наяд ам.долларт хүрсэн хэдий ч хөрөнгө оруулагчдын санаа зовнилыг арилгаж чадаагүй байна. Хиймэл оюуны зах зээлийн хөөсрөлтэй холбоотой санаа зовнил дахин "илэрч" байгааг АНУ-ын хөрөнгө оруулалтын Jefferies банкны шинжээч Брент Тилл анхааруулжээ. 

“Капиталын зардлыг нэмэгдүүлсэн нь "хиймэл оюуны стратегиудыг хэрэгжүүлэхэд илүү удаан хугацаа шаардагдаж магадгүй гэдгийг харуулж байна. Тиймээс энэ нь хиймэл оюунаас орлого олох гэж хошуурч байгаа хөрөнгө оруулагчдын хувьд төдийлөн таатай мэдээ биш юм" гэж 300 тэрбум ам.долларын хөрөнгийг удирддаг SLC Management Group-ийн гүйцэтгэх захирал Дек Мулларки ярилаа.