Баяр наадмын тухай хууль, хурдан морь, малчдын асуудал хөндөгдөж байгаа энэ үед УИХ-ын гишүүдээс эхлээд байр сууриа илэрхийлсээр байна.

Тухайлбал, УИХ-ын гишүүн С.Бямбацогт “ Адууны алаг сайхан, аяганы алаг муухай. Үүнийг засах гэж Зарчмын зөрүүтэй санал гаргалаа.

Монголын төр адилхан амжилт гаргасан бөхчүүдээ цол өгнө, өгөхгүй гэж алагчилж буй нь муухай байна.

Өнгөрсөн жилийн бөхийн барилдаан үнэхээр өргөн дэлгэр, өндөр чансаатай болсон. МҮБХ, Засгийн газраас цол өгнө гэсэн болохоор улс, аймаг, цэргийн алдар цолтнууд бүгд зодоглож, цолоо ахиулахын төлөө үнэн хүчийг үзэн барилдсан. Дугаар ангийн цэргүүдээр нэг хоёр давдаг урьдын жишгийг эвдсэнээрээ онцгой байлаа. Аймгийн начин цолтой 160 гаруй бөх барилдаж чадаагүй хасагдсан гээд бодохоор хэр зэрэг эрэмбэ чансаатай наадам болсон нь эндээс эрхгүй харагдана. Тийм болохоор тасарч үзээгүй монгол наадмынхаа бэлгэшээлийг бодсон ч, тасралтгүй наадамд бэлдэж цолонд хүрэх гэж зүтгэсэн бөхчүүдээ бодсон ч, Үндэсний их баяр наадмын тухай хуулийн заалтыг хэрэгжүүлж сэргээшийн шинжилгээ авсан зэргийг бодолцсон ч, уг наадамд уясан морьд нь айрагдсан уяачид, амжилт гаргасан харваачид цол чимгээ авсан зэрэг байдлыг харгалзан үзсэн ч шөвгөрсөн бөхчүүдийнхээ бярдаж хүрсэн цолыг нь төр гардуулж өгөх ёстой. МҮБХ ч надтай санал нэг байгаа юм билээ.

Том П.Сүхбатаас авахуулаад авах ёстой цолоо авч чадаагүй харуусам түүхийг өнөө цагийн өнгөнд давтах учиргүй гэдгийг л дахин дахин хэлж, хууль адил тэгш, шударга үйлчлэхийг сануулаад байгаа юм.

Гэтэл 2003 оноос өмнө авах ёстой цолоо аваагүй 70 бөхөд цолыг нь нөхөж олгоно гэсэн атлаа ноднин жилийн наадамд ноёлж барилдсан бөхчүүлдээ цолыг нь олгохгүй үлдээх нь хаанахын ёс вэ. Ид барилдаж байх үед нь хүрсэн цолыг нь өгөхгүй ирийг нь мохоодог муухай жишиг дахиад давтагдах нь.

АРДЫН ХУВЬСГАЛЫН 100 ЖИЛИЙН ОЙГООР ШӨВГӨРСӨН БӨХЧҮҮЛД АВАХ ЁСТОЙ ЦОЛЫГ НЬ НӨХӨЖ ОЛГООЧ ГЭСНИЙХЭЭ ТӨЛӨӨ АДЛАГДСАН Ч ХАМАА АЛГА” хэмээв.