УИХ-ын Төрийн байгуулалтын байнгын хороо хуралдаж Үндэсний их баяр наадмын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийн анхны хэлэлцүүлгийг хийв.

Энэ үеэр УИХ-ын гишүүн Х.Болорчулуун “Хот, хөдөөгийн малчид уяачдаа гадуурхаж байгаа юм шиг юм болоод байна. Засгийн газрын зарласан бүсийн уралдаанд цол, чимэг өгдөг байх хэрэгтэй. Үүн дээр чинь мөнгө төгрөгөөс илүү хөдөөгийн ард иргэд, уяачид баярлаж, баясдаг. Баяр наадмын тухай хууль бөөрөнхий хууль боллоо. Өндөр нам, үүлдэр угсаагаар нь ялгах гэхчлэн бүгд бүрхэг. Засгийн газарт даалгаад орхичихсон. Энэ хуулинд ямарч шинэлэг санаа байхгүй гэж харж байна. Байнгын хорооны дарга Ж.Мөнхбат асуудлыг бөөрөнхийлж байна” гэж байр сууриа илэрхийлэв.

Хариуд нь УИХ-ын гишүүн, ТББХ-ны дарга Ж.Мөнхбат “Битгий олон юм яриад байгаарай Х.Болорчулуун гишүүн ээ. Засгийн газрын өргөн барьсан төслийн дагуу л бид шийдэж явж байгаа шүү. Хуулийн 21/4-г Засгийн газар үндэсний баяр наадмыг Баяр наадмыг зохион байгуулах хороо зохион байгуулна гэж орж ирсэн. Яг тэр агуулгаар нь Засгийн газар батална л гэж явж байна. Цол олгох асуудлыг өнгөрсөн ажлын хэсэг дээр дэмжээд гаргасан. Уначихсан байсан юмыг шүү. Энэ асуудал сая Байнгын хороон дээр унахад гурван удаа тайлбарлаж, хоёр удаа санал хураалгалаа. Засгийн газар анхнаасаа өөрсдөө ийм зөрүүтэй асуудал оруулж ирсэн. Ажлын хэсгийн буруу юунд байгаа юм. Тийм юм бол, та нар өөрсдөө орж ирээд энийгээ лоббидоод үгээ хэлэхгүй яасан юм бэ” хэмээн бухимдав.