УИХ-ын чуулганы үдээс хойших хуралдаан үргэлжилж байна. Хуралдаанаар  Шүүхийн шийдвэр гүйцэтгэх тухай хуульд өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслүүдийг хэлэлцэж эхэллээ. Хэлэлцэж буй асуудалтай холбогдуулж гишүүд асуулт асууж, хариулт авч байна.

УИХ-ын гишүүн С.Чинзориг “Манайд мөрдөн шалгах үйл ажиллагаа явуулдаг олон бүтцийн байгууллагууд байна.  АТГ, Цагдаа, Прокурор, Тагнуул зэрэг ийм олон байгууллагуудад зэрэг мөрдөн шалгах ажиллагаа явуулахаар иргэдийг хохироодог, чиг үүрэг нь давхцдаг, иргэдийн эрхэнд халддаг, тагнаж чагнадаг асуудлууд яригддаг. Ер нь цаашдаа мөрдөн шалгах байгууллагын бүтцэд өөрчлөлт оруулах боломж бий юу. Бусад орнуудад нэг л мөрдөн шалгах ажиллагаа явуулдаг бүтэц байдаг. Үндэсний хэмжээний мөрдөн шалгах нэг байгууллагатай болох боломж байна уу. Прокурорын мөрдөн шалгах албыг 2017 онд хуулинд өөрчлөлт оруулж АТГ-т шилжүүлсэн. Үүнийг эргэж харахгүй юм уу. Ерөнхий прокурорын дэргэд нь ажиллуулвал илүү зохимжтой биш үү. Прокурорын дэргэдэх мөрдөн байцаах албыг сэргээж байгуулах шаардлагатай гэдэг мэдээллийг би авсан. Х.Нямбаатар юм ярихаараа л гадны байгууллагуудын өгсөн зөвлөмж гэдэг. Энэ хүрээнд энэ асуудлаа авч үзэж болдоггүй юм уу” гэв.

ХЗДХ-ийн сайд Х.Нямбаатар “Мөрдөн ажиллагааг боловсронгуй болгох судалгааны ажил хийгдэж байгаа” хэмээв.