УИХ-ын чуулганы үдээс хойших хуралдаан үргэлжилж байна. Хуралдаанаар  Шүүхийн шийдвэр гүйцэтгэх тухай хуульд өөрчлөлт оруулах тухай хуулийн төсөл болон хамт өргөн мэдүүлсэн хууль, тогтоолын төслүүдийг хэлэлцэж эхэллээ.Хэлэлцэж буй асуудалтай холбогдуулж гишүүд асуулт асууж, хариулт авч байна.

УИХ-ын гишүүн Б.Жаргалмаа “Өнөөдрийн байдлаар  хаалтай, нээлттэй Хорих 407 дугаар ангид нийт 58 эмэгтэй албан хаагч ажиллаж байгаа гэдэг мэдээлэл байна.  Тэд хүүхэд асрах чөлөө авахад ажилласан жилийн хоног хасагдаж тооцогддог гэдэг зүйлийг ярьж байна. Нөгөөтэйгүүр эмэгтэй гишүүд хамтраад хорих ангид ял эдэлж байгаа ээж, хүүхдүүдийн асуудлаар 407 дугаар хорих ангид очиж уулзсан. Бидэнд өгсөн мэдээллээр,

2020 онд 14 хүүхэд, 2021 онд 6 хүүхэд, 2022 оны тавдугаар сарын байдлаар 3 хүүхэд ээжтэйгээ хамт ял эдэлж байна.

 

Энэ байдлыг цахим гав зүүлгэх байдлаар шийдэж болдоггүй юм уу. Мэдээж шүүхээс ял эдлэх заалтыг нарийн зааж өгдөг нь тодорхой. Гэхдээ гэр бүлийн хэн нэгэнд нь ялыг үүрүүлэх энэ байдлыг халах шаардлагатай байна. Хүүхдийн эрх, иргэний эрх, Үндсэн хууль зөрчиж байгаа энэ заалтыг хэрхэн яаж өөрчлөх вэ. Тэнд 1 ой 4 сартай, 6 сартай бүр 2 ихэр хүүхэд хоригдож байсан. Харгалзагч орж ирэхээр босч зогсоод хүний өөдөөс харж чадахгүй хүүхдүүд хүмүүжиж байна. Энэ бол хүний эрхийн асуудал. Гэрт нь харж хандах хүн байхгүй, ээж нь хүүхэдтэйгээ хамт байна гэдэг саналыг авч хүүхдийг ээжтэй нь хорьдог. Энэ сард тэнд ахиад шинэ хүүхэд төрөх гэж байна. Гэмт хэрэг хийгээгүй хүүхэд торны цаана хоригдож байна” хэмээв.

Хурандаа Ц.Очгэрэл “Өнөөдрийн байдлаар Монгол Улсын хэмжээнд эмэгтэй албан хаагч хамгийн түлхүү ажилладаг 407 дугаар ангийн асуудал шүүхийн шийдвэр гүйцэтгэх байгууллагын анхаарлын төвд байсаар байгаа. Эмэгтэй алба хаагчдын гүйцэтгэх үүрэг ч их. Өнөөдрийн хүчин төгөлдөр мөрдөгдөж байгаа хуулиар хүүхэд асрах чөлөөтэй хугацаа нь ажилласан жилд тооцогдож цэргийн бүрэн тэтгэвэрт тооцогдоод явна.

Харин жирэмсэн болон нярай хүүхэдтэй ээжид ял эдлүүлэх асуудал хорихын тусгайлсан байр орчинд 2 жилийн хугацаанд ээжтэй нь хамт тусгаарлаж байгаа” гэв.