Айсуй 2027 онд Ерөнхийлөгчийн сонгууль болох учраас улс төрийн намууд сэмхэн нэр дэвшигчдээ бэлдээд эхэлчихэж. Тиймээс Ерөнхийлөгчийн сонгуульд өрсөлдөх магадлал бүхий, рейтинг өндөр байгаа нэгнээ ч “намнаж” байгаа бололтой. Тэр тусмаа УИХ-ын гишүүн Л.Гантөмөрийг илтэд оролдож байгаагийн цаана юу байна вэ. АН-аас Ерөнхийлөгчид нэр дэвших хамгийн өндөр магадлалтай хүн бол Л.Гантөмөр, Н.Алтанхуяг нарын хуруу дарам цөөн хүн бий. Мэдээж хэрэг, нэр дэвших санаатай өөр бусад хүмүүс ч мэр сэр байж таарна. Тиймээс нам дотроо сунгаа явуулж нэр дэвшигчээ тодруулах байх. Л.Гантөмөр улстөрчийн хувьд нэгэнт АН-ын лидер болон өсөж өндийсөн гэдэгтэй маргах хэрэггүй. Тэр АН дотор бүхий л үетэйгээ хамгийн сайн ойлголцдог хүн гэдгээ нэгэнт харуулж чадсан.

Тиймдээ ч Ц.Элбэгдорж, С.Эрдэнэ, Х.Баттулга нарын олон өвгөд нь тарааж орхисон АН-ыг Л.Гантөмөр эвлүүлж, УИХ-д арав хүрэхгүй суудалтай байсан намыг 42 суудалтай хүчтэй сөрөг хүчин бий болгосон нь үүнийг илтгэнэ.

Үнэндээ АН арван зүгтээ харчихсан, 2016 оноос хойш олон шатны сонгуульд үнэмлэхүй ялагдчихсан, эргэж өндийх үү, дампуурах уу гэдэгтээ тулчихсан байв. Харин Л.Гантөмөр нам доторхи фракц бүлэглэлүүдийн тэгш байдлыг хангаж, нэгэн зүгт харуулж чадсан юм. Ингээд зогсохгүй Засгийн газарт хамтран, Тэргүүн Шадар бөгөөд Эдийн засгийн хөгжлийн сайдаар ажиллахдаа Засгийн газрын тогтвортой байдлыг хангах үүднээс эв эеийг хичээж, Засгийн газраас зарласан мега төслүүдэд ач холбогдол өгч ажилласан ч МАН Засгийн газраа унагааж, АН ч гарсан. Л.Гантөмөр ч дарга, сайдын суудалтай зууралдаж, МАН-ын халаасанд орохыг хүсээгүй. Намаа нэгэн туган дор нэгтгэж өгчихөөд чимээгүйхэн явчихсан улстөрч. Тэр УИХ-д 42 суудалтай хүчтэй сөрөг хүчин О.Цогтгэрэлд хүлээлгэж өгөөд явсан ч цаадуул нь харин МАН-ын халаасанд гүйгээд орчихлоо. Сөрөг хүчнийхээ ажлыг ч хийж чадахгүй сууна.

Монгол Улсад ардчиллыг бэхжүүлэхэд АН ус агаар шиг хэрэгтэй. Нөгөө талаар АН-аас Ерөнхийлөгчтэй болж гэмээнэ ардчиллын үнэт зүйл хөрсөн дээр бэхжиж өндийнө. АН-аас 2009-2017 онд Ерөнхийлөгчөөр Ц.Элбэгдорж ажиллаж байх үед буюу 2012 онд АН сонгуульд ялалт байгуулж, засгийн эрхэнд гарч байв. Улмаар АСЕМ зохион байгуулахаас эхлээд НҮБ-ын индэр хүртэл Монгол Улсыг олон улсад ардчилсан орон шүү гэдгийг тунхаглаж чадсан.

Тиймээс айсуй 2027 онд АН зөв хүнээ Ерөнхийлөгчийн сонгуульд нэр дэвшүүлж гэмээнэ ялалт байгуулах магадлалтай. Ингээд АН дотор Ерөнхийлөгчийн сонгуульд нэр дэвших, улмаар ялах магадлал бүхий хүн нь Л.Гантөмөр гэдгийг АН-ынхан ч хэлж байна. Улс төрийн хүрээнд ч ярих болжээ. Н.Алтанхуягийн хувьд нам дотроо түүний өрсөлдөгч байж болох ч насны хярд гарсан түүнийг ялалт байгуулна гэдэг ихээхэн эргэлзээтэй. Л.Гантөмөрийн хувьд ид насан дээрээ явна, ажилласан туршлага, олсон боловсрол гээд дутах юм алга.

Улстөрчийн хувьд ч бяд сууж, зангараг харуулах болсныг олон зүйлээс харж болно. Тэрбээр УИХ-д дөрвөн удаа сонгогдон ажиллахдаа Эдийн засгийн байнгын хорооны дарга, Боловсрол, Соёл, Шинжлэх ухааны сайд, Тэргүүн шадар сайд бөгөөд Эдийн засаг, хөгжлийн сайдаар тус тус ажилласан хүн. Боловсрол, соёл, шинжлэх ухааны сайдаар ажиллахдаа Кембрижийн хөтөлбөрийг оруулж ирж нутагшуулсан. Энэ нь Монголын боловсролын салбарт шинэчлэл болсон төдийгүй дэлхийн жишигт нэг алхам дөхөж очсон явдал байв.

Мөн Тэргүүн шадар сайд бөгөөд Эдийн засаг, хөгжлийн сайдаар богино хугацаанд ажиллахдаа Засгийн газраас санал болгосон томоохон төсөл хөтөлбөрүүдийг амжилттай гаргаанаас гаргасан. Гадна дотны гэрээ хэлцэлд манлайлан оролцож, хоёр хувьд уруудаж ирээд байсан эдийн засаг өдгөө 6.4 хувьтай болж өндийсөн мэдээллийг өгч байгаагийн цаана Эдийн засгийн хөгжлийн сайд асны нөлөө байж таарна. Энэ бүхнийг хэрэгжүүлэхэд түүний Төрд ажилласан туршлага, хилийн чанад сурсан мэдлэг боловсрол туйлын хэрэгтэй байв.

Л.Гантөмөр хөгжил, технологиороо дэлхийд тэргүүлэгч Япон улсын Сэндай коллежийг Цахилгаан холбооны инженер, мөн Нагаока технологийн их сургуулийн Электроникийн инженерээр тус тус төгссөн. Одоо тэр Нагаока технологийн их сургууль, Сэндай коллеж, Монгол Улсын Шинжлэх Ухаан Технологийн их сургууль, Анагаахын Шинжлэх Ухааны Үндэсний их сургууль гээд гадаад хоёр, Монголын хоёр нийт дөрвөн сургуулийн “Хүндэт доктор”, “Хүндэт профессор” цол хүртсэн юм. Харин рейтинг өндөр, карьер нь өсөж яваа улстөрчийг харлуулах, сонгуульд нэр дэвшүүлэхгүй байхыг АН дотор ч МАН-аас ч илтэд зохион байгуулалттай зүйлс гаргаж ирж байгаа нь харамсалтай. Л.Гантөмөрийг илтэд оролдож, харлуулж байгаагийн цаана Ерөнхийлөгчийн сонгууль бий болов уу.

С.Ууганбаяр