Хятадын баруун хойд нутгийн Шинжаан Уйгурын өөртөө засах оронд "Тяньшань Шэнли" нүхэн гарцыг албан ёсоор нээжээ. Мөнх цаст уулсын дундуур дамжин өнгөрөх энэхүү шинэ нүхэн гарц бол хурдны замын дэлхий дээрх хамгийн урт нүхэн гарц бөгөөд түүнийг нээснээр Хятадын дэд бүтцийн салбарт онцгой чухал үйл явдал боллоо. Уг нүхэн гарц бол Шинжааны өмнөд болон умард хэсгийг холбосон хамгийн дөт зам юм. 

Хятад хэлнээс хөрвүүлбэл "ялалт" гэсэн утга бүхий нэртэй, 22.13 км урт энэхүү нүхэн гарц ашиглалтад орсноор Тяньшань уулын дундуур хэдэн цагийн турш явдаг байсныг 20 минут болгон багасгана. 

Энэ өдөр мөн Шинжааны умард хэсэгт орших Өрөмч мужийн засаг захиргааны төвөөс өмнөд хэсэгт орших Юли хошуу хүртэл үргэлжилдэг G0711 Өрөмч-Юли өндөр хурдны замыг ашиглалтад оруулжээ "Тяньшань Шэнли" нүхэн гарц бол уг замын нэг хэсэг юм.  

Тяньшань уул нь Шинжааны хойд хэсгийн хамгийн том хот болох Өрөмчийг тус бүс нутгийн өмнөд нутгийн хамгийн том хот Корлагаас тусгаарлан Төв Шинжааны нутгаар 2500 км сунан тогтдог. Хурдны зам нээгдсэнээр уг хоёр том хотын хооронд машинаар зорчих хугацаа 7 цаг байснаас ойролцоогоор гурван цаг болон богиносож, Шинжааны хойд ба өмнөд хэсгийг эдийн засгаар нэгтгэх, гадаадтай харилцах шинэ сувгуудыг бий болгоход тус дөхөм болно. Таван жилийн хугацаанд баригдсан энэхүү хурдны зам нь 324.7 км урт бөгөөд нийт хөрөнгө оруулалт нь 46.7 тэрбум юань (ойролцоогоор 6.63 тэрбум ам.доллар) болжээ.